سنڌ جي وحدت، 18هين ترميم ۽ اين ايف سي تي سمجهوتو نه ٿيندو: سنڌ اسمبلي ۾ ٺهراءُ منظور

ڪراچي(رپورٽ: شاھد ميراڻي) سنڌ اسيمبلي  پ پ جي 58هين يومِ تاسيس تي پارٽي جي باني شهيد ذوالفقار ڀٽو ۽ شهيد بينظير ڀٽو کي ڀرپور خراجِ تحسين پيش ڪندي 1973ع جي بحال ڪرايل آئين، 18هين ترميم، صوبائي خودمختياري ۽ اين ايف سي ايوارڊ ۾ صوبن جي حصي بابت ڪنهن به قسم جو سمجهوتو نه ڪرڻ ۽ سنڌ جي وحدت، سالميت ۽ حقن کي نقصان پهچائڻ واري هر سازش کي ناڪام بڻائڻ جو ٺهراءُ اتفاقِ راءِ سان منظور ڪري ورتو، ڪالهه  پ پ سنڌ جي صدر نثار کھڙو پ پ جي يوم تاسيس جي حوالي سان ٺهراءُ پيش ڪيو، جنهن کي ايوان اتفاق راءِ سان منظور ڪري ورتو، ٺهراءَ جي متن موجب ايوان  پ پ جي 58 هين يومِ تاسيس تي شهيد ذوالفقار ڀٽو ۽ شهيد بينظير ڀٽو کي زبردست خراجِ عقيدت پيش ڪري ٿو، جن عوام، جمهوريت ۽ جمهوري قدرن خاطر پنهنجي جانين جو نذرانو پيش ڪيو قرارداد ۾ چيو ويو ته هي ايوان ٻيهر اظهار ڪري ٿو ته 1973ع جي بحال ڪرايل آئين ، 18هين ترميم، صوبائي خودمختياري ۽ اين ايف سي ايوارڊ تحت صوبن جي حصي بابت ڪو به سمجهوتو نه ڪيو ويندو ۽ انهن جو تحفظ ڪيو ويندو. قرارداد ۾ چيو ويو ته سنڌ جي وحدت، سالميت ۽ تاريخي حقن کي نقصان پهچائڻ يا ڪمزور ڪرڻ جي هر ڪوشش يا سازش کي ناڪام بڻايو ويندو. سنڌ جي اڳوڻي وڏي وزير سيد قائم علي شاهه چيو ته شهيد ڀٽو  ملڪ کي 1973ع جو متفقه آئين ڏنو.  پ پ جي امداد پتافي خيرالنساءُ مغل ۽ ٻين چيو ته شهيد ذوالفقار علي ڀٽو ملڪ کي ايٽم بم سان نوازيو، پيپلز پارٽي شهيد ڀٽو ۽ شهيد بينظير ڀٽو جي منشور کي اڳتي وڌائي رهي آهي. ايوان ۾ قانون واري وزير ضياءُ الحسن لنجار سنڌ هاءِ ڪورٽ ۾ آئيني بينچون قائم ڪرڻ بابت گورنر پاران جاري ڪيل آرڊيننس پيش ڪيو ، جنهن کي وڌيڪ غور لاءِ لاڳاپيل اسٽينڊنگ ڪاميٽي ڏانهن موڪليو ويو. ايوان سنڌ زرعي آمدني ٽيڪس ترميمي بل پڻ منظور ڪري ورتو،
 

ڪراچي: ايم ڪيو ايم جي ايم پي اي صابر قائمخاني ڌيان ڇڪايو نوٽيس ذريعي ڄاڻايو ته حيدرآباد واسين کان ميرپورخاص روڊ تي ڏيٿا ٽول پلازا تي ٽول ٽيڪس وصول ڪيو پيو وڃي.آئون  مطالبو ڪريان ٿو ته ٽنڊو الهيار، ٽنڊو ڄام ۽ ميرپورخاص جي ماڻهن سان انصاف ڪيو وڃي. ورڪس جي پارلياماني سيڪريٽري فرخ شاهه چيو ته سپريم ڪورٽ جو حڪم آهي ته پنجن ڪلوميٽرن  اندر ٽيڪس نه ورتو وڃي.* سنڌ اسيمبلي جي اسپيڪر ايوان ۾ وزيرن جي غير موجودگي جو سخت نوٽيس وٺي حڪم ڏنو ته پارلياماني معاملن جو وزير نوٽيس جو جواب ڏيڻ لاءِ ايوان ۾ موجود گي کي يقيني بڻائي.
 

خراب آر اوز جي مرمت لاءِ ڏوڪڙن جا مسئلا آهن: پبلڪ هيلٿ کاتي جون دانهون
 

ڪراچي: سنڌ ۾ پاڻي پيئڻ لائق بڻائڻ لاءِ دنيا جي بهترين ٽيڪنالاجي استعمال ڪئي پئي وڃي ان ڏس ۾ پبلڪ هيلٿ جي پارلياماني سيڪريٽري سليم بلوچ سنڌ اسيمبلي  پنهنجي کاتي جي سوالن جي وقفي دوران چيو ته ٿرپارڪر ۾ ايشيا جو سڀ کان وڏو واٽر فلٽر پلانٽ لڳايو ويو آهي. ٿر ۾ 832 آر او لڳل آهن. هن چيو ته هن وقت اسان سنڌ ۾ سولرائيزيشن تي ڪم ڪري رهيا آهيون. پارلياماني سيڪريٽري چيو ته گذريل ٻن سالن ۾ سنڌ ۾ 78 آر او پلانٽ لڳايا ويا آهن، ڪجهه آر او ڪجهه ٽيڪنيڪل مسئلن  ڪري ڪم نه ڪري رهيا آهن. غير فعال آر اوز کي جلد هلايو ويندو هن چيو ته اسان وٽ آر او ز لاءِ ڪجهه مالي مسئلا آهن، آپريشن ۽ مينٽيننس لاءِ محدود بجيٽ آهي