سنڌ حڪومت ڪمند پيڙهائي ڪرائڻ ۽ اگهه مقرر ڪرڻ ۾ ناڪام، رڳو هڪ شگر مل هلندڙ: آبادگار پريشان    

ڪراچي(رپورٽ: شاهد ميراڻي) سنڌ ۾ ڪمند جو سرڪاري اگھه اڃا تائين لٽڪيل، ڪمند جو سرڪاري اگھه مقرر نه ٿيڻ ۽ شگر ملن پاران پيڙهائي شروع نه ڪرڻ سبب ڪڻڪ جي پوکي سخت متاثر، آبادگارن ڪڻڪ جي پوکي متاثر ٿيڻ سبب ايندڙ سال خوراڪ جو بحران پيدا ٿيڻ جو خدشو ظاهر ڪندي ڪمند جو اگهه 600 رپيا في مڻ مقرر ڪرڻ جو مطالبو ڪري ڇڏيو آهي. 18 شگر ملن رڳو چمنيون ٻاري ڇڏيون، سانگھڙ شگر مل پيڙهائي شروع ڪري ڇڏي، هر سال 11 لک 76 هزار هيڪٽرس تي ٿيندڙ ڪڻڪ جي پوکي پهرين نومبر کان 30 نومبر تائين شروع نه ٿيڻ جي ڪري هيل ڪڻڪ جي پوکائي شديد متاثر ٿيڻ جو امڪان آهي. ان حوالي سان مليل ڄاڻ موجب ته هر سال هن سال به شگر ملن جي تنظيم پاسما پاران سنڌ حڪومت جا حڪم هوا ۾ اڏائيندي ڪمند جو اگھه مقرر ڪرڻ لاءِ 2 ڀيرا سڏايل اجلاس ۾ شرڪت نه ڪئي، جنهن ڪري ڪمند جو سرڪاري اگھه مقررڪرڻ وارو معاملو لٽڪيل آهي، ڪمند جو اگھه مقرر نه ٿيڻ ۽ شگر ملن پاران پيڙهائي شروع نه ڪرڻ سبب ڪمند جي ڪٽائي به شروع نه ٿي سگھي آهي، جنهن ڪري شگر ڪين بيلٽ ۾ ڪڻڪ جي پوکائي به شروع ناهي ٿي، جنهن سبب ڪڻڪ جي اپت گھٽجڻ ۽ ايندڙ سال ڪڻڪ جو شديد بحران پيدا ٿيڻ جو امڪان آهي. ان حوالي سان آبادگارن جي تنظيم ايوان زراعت جي اڳواڻ زاهد ڀرڳڙي “پنهنجي اخبار” سان ڳالهائيندي چيو ته ڪڻڪ جي پوکائي جو ٽائيم پهرين کان 30 نومبر تائين هوندو آهي، ڪمند جي ڪٽائي نه ٿيڻ ڪري ڪڻڪ جي پوکي به متاثر ٿيندي. هن چيو ته شگر ملون مافيا جو روپ ڌاري ويون آهن، سرڪار کي پاسما وارن کنگھيو ئي ناهي، حڪومت پاسما جي مرضي کانسواءِ به ڪمند جو اگھه مقرر ڪري سگھي ٿي پر حڪومت پاسما اڳيان مجبور آهي. هن چيو ته اڃا تائين سنڌ ۾ رڳو سانگھڙ شگر مل پيڙهائي شروع ڪئي آهي، باقي 18 شگر ملن رڳو چمنيون ٻاريون آهن، هن مطالبو ڪيو ته ڪمند جو 600 رپيا في مڻ اگھه مقرر ڪري ٻن ڏينهن اندر شگر ملون هلايون وڃن، جيئن آبادگار ڪمند جي ڪٽائي ڪري سگھن.