| سنڌ خلاف خاص مهم هلائي پئي وڃي ته اختيار اسلام آباد کي ملن، ڪجهه قوتون حقن ۽ وسيلن تي ڌاڙو هڻڻ چاهين ٿيون: بلاول |
مٺي (رپورٽ: ممتاز نهڙيو) پيپلز پارٽي جي چيئرمين بلاول ڀٽو زرداري چيو آهي ته سنڌ خلاف خاص مهم هلائي پئي وڃي ته اختيار اسلام آباد کي ڏنا وڃن، ڪجهه قوتون سنڌ جي حقن ۽ وسيلن تي ڌاڙو هڻڻ چاهين ٿيون،سازش تحت بهانو ٺاهيو پيو وڃي ته سنڌ سرڪار ڪجهه نه ڪيو آهي، 18 ترميم تحت ڏنل اختيار واپس وٺڻ چاهين ٿا، ٿر ۾ ايترو ڪوئلوآهي جيترو سعودي وٽ تيل، وسيلا استعمال ڪرڻ جي اجازت نٿي ملي، مٺي ۾ اين اي ڊي يونيورسٽي جي نئين ڪيمپس ٿر انسٽيٽيوٽ آف ٽيڪنالاجي جي افتتاحي تقريب کي خطاب ڪندي بلاول ڀٽو زرداري چيو آهي ته ڪوڙو بيانيو ٺاهيندڙ قوتن لاءِ بهترين جواب ٿرپارڪر آهي، ٿر جي عوام اُنهن کي غلط ثابت ڪيو آهي، جيڪي سمجهن ٿا سنڌ جي عوام لاءِ ترقيءَ جو رستو رڳو اسلام آباد مان نڪرندو، ٿرپارڪر ۾ ايترو ڪوئلو آهي جيترو سعودي عرب ۾ تيل آهي، هڪ رٿا نه رڳو ٿر ۾ معاشي انقلاب آندو پر فيصل آباد کي به معاشي فائدو ڏنو، پ پ چيئرمين چيو ته سنڌ سرڪار 2008ع کان هيل تائين مادر علمين جو انگ ٻيڻو ڪيو آهي، واعدو آهي ته ٿر ۾ اين اي ڊي يونيورسٽي جي ڪئمپس کي مادر علمي ۾ تبديل ڪيو ويندو، اسان جو مقابلو ڪو ٻيو صوبو نٿو ڪري سگهي، پ پ چيئرمين چيو ته ٿرپارڪر وٽ ايترو ڪوئلو آهي جيترو سعودي عرب وٽ تيل آهي پر توهان کي پنهنجا وسيلا استعمال ڪرڻ نه ڏنا ويا، محترمه بينظير ڀٽو ڪم شروع ڪيو ته سازش تحت کيس روڪيو ويو. هن وڌيڪ چيو ته ڪوئلي سان گڏ معاشي انقلاب سان گڏ سماجي انقلاب به ڏسڻ ۾ آيو آهي. پاڪستان پيپلز پارٽي جي حڪومت غريب دوست ۽ عوام دوست حڪومت آهي، صحت هجي يا تعليم، هميشه عوام جي مفاد کي اوليت ڏني وئي آهي. هن چيو ته اها حقيقت آهي ته پيپلز پارٽي جي دور ۾ سنڌ ۾ يونيورسٽين جو انگ ٻيڻو ڪيو ويو آهي، ۽ جيڪڏهن ڪيمپس شامل ڪجن ته اهو انگ اڃا وڌيڪ آهي. “چاهي تعليم جا ادارا هجن يا صحت جا، سنڌ ۾ هجن يا وفاق ۾، جتي جتي پيپلز پارٽي کي موقعو مليو آهي، عملي ڪم ڪري ڏيکاريو ويو آهي.