سنڌ ڪابينا آرڪائيوز کاتي لاءِ 100 ملين، ڪي ايل ايف لاءِ 3 ڪروڙ رپيا منظور ڪري ورتا

ڪراچي (اسٽاف رپورٽر)  سنڌ ڪابينا آرڪائيوز کاتي لاءِ 100 ملين، ڪي ايل ايف لاءِ 3 ڪروڙ رپيا منظور ڪري ورتا، ان کانسواءِ تعليم، ثقافت، سيڪيورٽي، زراعت، ماحولياتي قدمن، انفراسٽر ڪچر ۽ سماجي تحفظ بابت وسيع پيماني تي مالي، انتظامي ۽ پاليسي فيصلن جي منظوري ڏني وئي. ڪابينا سڀني کاتن کي هدايت ڪئي ته فيصلن تي وقت سر عملدرآمد، شفافيت ۽ ماپ جوڳا نتيجا يقيني بڻايا وڃن. وزيراعليٰ هائوس ۾ وڏي وزير جي صدارت ھيٺ ٿيل اجلاس ۾  خطاب ڪندي وڏي وزير  چيو ته حڪومت جي ترجيح رڳو منظوريون نه پر عملي نتيجا آهن. عوامي وسيلا عوامي خدمتن ۽ زندگي جي معيار ۾ واضح بهتري جي صورت ۾ نظر اچڻ گهرجن. ڪابينا پاران منظور ڪيل هر رپيو شفاف نموني خرچ ڪيو وڃي ۽ ان جي سخت نگراني ڪئي وڃي.اجلاس ۾  ناڻي بابت ڪابينا ڪميٽي جي رپورٽ پيش ڪندي بلدياتي وزير سيد ناصر حسين شاهه ڪابينا کي مختلف سفارشن بابت آگاهه ڪيو. ڪابينا اين اي ڊي يونيورسٽي آف انجنيئرنگ اينڊ ٽيڪنالاجي، ڪراچي جي گرلز هاسٽل ۾ ٻه ماڙ جي تعمير لاءِ 190.211 ملين رپين جي منظوري ڏني. وڌي وزير چيو ته شاگردياڻين لاءِ رهائشي سهولتن ۾ واڌ اعليٰ تعليم ۾ عورتن جي داخلا وڌائڻ لاءِ انتهائي ضروري آهي. ثقافتي ورثي جي تحفظ لاءِ ڪابينا سکر جي سينٽ سيورز چرچ ۽ حيدرآباد جي سينٽ ٿامس ڪيٿڊرل چرچ جي مرمت ۽ بحالي لاءِ 109.5 ملين رپين مان اڌ لاڳت واري رقم  جي منظوري ڏني، جڏهن ته باقي رقم ايندڙ مالي سال ۾ فراهم ڪئي ويندي. وڏي وزير چيو ته سنڌ جو ورثو سڀني برادرين جو گڏيل اثاثو آهي ۽ ان جو تحفظ عزت ۽ وقار سان ڪيو وڃي.سنڌ ڪابينا ڪراچي لٽريچر فيسٽيول لاءِ 30 ملين رپيا ۽ سنڌ آرڪائيوز کي مضبوط ڪرڻ لاءِ 100 ملين رپين جي منظوري پڻ ڏني، جنهن ۾ ناياب مسودن جي اشاعت، پراڻن اخبارن جو تحفظ، رڪارڊ جي ڊجيٽلائيزيشن ۽ اورل هسٽري ۽ آرڪائيوئل گيلري جو قيام شامل آهي. اندروني سيڪيورٽي بابت ڪابينا صوبائي انٽيليجنس فيوزن اينڊ ٿريٽ اسيسمينٽ سينٽر  کي فعال بڻائڻ لاءِ اصولي طور 1.24 ارب رپين جي منظوري ڏني. هن پيڪيج ۾ سامان، عملي، جي سار سنڀال ۽ گاڏين جا خرچ شامل آهن، جڏهن ته گاڏين جي خريداري جو معاملو ڪابينا ڪميٽي براءِ ڪفائت شعاري آڏو پيش ڪرڻ جي هدايت ڪئي وئي. وڏي وزير سيد مراد علي شاهه چيو ته سيڪيورٽي ادارن کي مضبوط ڪرڻ ضروري آهي، پر هر خرچ مالي نظم و ضبط ۽ واضح جواز سان هئڻ گهرجي.ڪابينا صوبي ۾ سوين منصوبن تي ٻڌل پائيدار ترقياتي هدفن ايس ڊي جيز اسڪيمن لاءِ فنڊز جي جاري ٿيڻ ۽ تصديق جي طريقيڪار جي منظوري پڻ ڏني. ان کان علاوه سنڌ لوڪل گورنمينٽ بورڊ جي نون مقرر ٿيل آفيسرن جي ٻن هفتن جي انڊڪشن ٽريننگ لاءِ 140 ملين رپيا منظور ڪيا ويا.