سنڌ ۾ خانگي شعبي کي نو لفٽ: هارين کي سرڪار جو تيار ٿيل ٻج ڏيڻ جو فيصلو

ڪراچي (رپورٽ: شاهد ميراڻي) سنڌ حڪومت پاران خانگي شعبي کان زرعي ٻِج خريد ڪرڻ بجاءِ سرڪاري تيار ڪيل ٻِج هارين سستي اگھن تي هارين کي ڏيڻ ۽ سنڌ سيڊ ڪارپوريشن پاران صوبي ۾ زرعي زمين جي جيو مارڪنگ ڪرائڻ جو فيصلو ڪيو ويو آهي. ان حوالي سان ڪالهه زراعت واري وزير محمد بخش مهر جي صدارت هيٺ سيڊ ڪارپوريشن جي ڪارڪردگي جو جائزو وٺڻ بابت اهم اجلاس ٿيو، جنهن ۾ سيڪريٽري زراعت سميت ٻين لاڳاپيل اختيارين پاران شرڪت ڪئي وئي. اجلاس دوران سنڌ سيڊ ڪارپوريشن پاران ڪارڪردگي رپورٽون پيش ڪيون ويون. لاڳاپيل اختيارين بريفنگ ۾ ٻڌايو ته گذريل سال 352 ايڪڙ وڌيڪ زمين تي ڪڻڪ جي پوک ڪئي وئي, مجموعي طور 2242.85 ايڪڙ تي ڪڻڪ پوکي وئي، ڪپهه مان هڪ ڪروڙ 20 لک رپيا،جڏهن ته چانورن جي فصل مان هڪ ڪروڙ 60 لک رپيا آمدني حاصل ڪئي وئي. اجلاس کي آگاهي ۾ ٻڌايو ويو ته سنڌ سيڊ ڪارپوريشن پاران هارين کي ڪڻڪ جي ٻج جا 2170 (بيگز) فراهم ڪيا ويا. 295 مڻ ڪپهه جي جننگ ڪئي وئي، فش پونڊز مان به آمدني حاصل ڪئي وئي، ان موقعي تي صوبائي وزير محمد بخش مهر چيو ته لينڊ گريبرز خلاف 2 ڪيس داخل ڪرائي گهوٽڪي مان 120 ايڪڙ زمين ناجائز قبضي مان آزاد ڪرائي اتي ڪڻڪ پوکي وئي آھي. صوبائي وزير چيو ته سنڌ سيڊ ڪارپوريشن جي صوبي ۾ سموري زرعي زمين جيو مارڪنگ ڪرائي وڃي. هن چيو ته زمين جون حدون، ايراضي ۽ جڳهه جي پي ايس ۽ نقشن ذريعي ڪمپيوٽر ۾ محفوظ ڪيون وينديون. صوبائي وزير لاڳاپيل اختيارين کي هدايت ڪندي چيو ته ايندڙ وقت ۾ صوبي جي هارين کي سنڌ سيڊ ڪارپوريشن ذريعي سرڪاري معياري ٻج سستي اگهن تي فراهم ڪيو وڃي. صوبائي وزير چيو ته سڌارن ذريعي سنڌ سيڊ ڪارپوريشن کي مالي ۽ انتظامي طور ھاڻ پنهنجي پيرن تي بيهاريو آهي.