| سن ويندڙ قافلن خلاف ڪارروائي: مختلف شهرن مان ايس يو پي ۽ جسقم جا 8 ڪارڪن گرفتار |
ڪراچي(نمائندن وٽان) سن ويندڙن قافلن خلاف ڪارروائي: مختلف شهرن مان ايس يو پي ۽ جسقم جا 8 ڪارڪن گرفتار، ان ڏس ۾ ٽنڊوآدم پوليس ايس يو پي ضلعي سانگهڙ جي اڳوڻي صدر ڪامريڊ محمد خان پنھور ۽ تعلقي ٽنڊو آدم جي آرگنائيزر سڪندر ملوکاڻي کي گرفتار ڪري ورتو. هوڏانهن ايس يو پي موجب سائين جي ايم سيد جي سالگرھه ۾ شرڪت لاءِ ويندڙ قافلن کي روڪڻ لاءِ گرفتاريون ڪيون ويون آهن. ٻئي طرف دوڙ ۾ پوليس اٽالن جيئي سنڌ قومي محاذ جي تعلقي آفيس تي چڙهائي ڪئي، انهي دوران ڪا به گرفتاري عمل ۾ نه آئي، هوڏانهن جسقم دوڙ جي اڳواڻ طاهر زرداري ميڊيا سان ڳالهائيندي چيو ته جسقم ڪارڪن پرامن نموني سان سائين جي ايم سيد جي سالگرهه جي تقريب ۾ شرڪت لاءِ وڃي رهيا آهن، پوليس گرفتاري جي ڪوشش ڪئي ته سخت مزاحمت ڪئي ويندي. شهدادپور ۾ پوليس ڪارڪنن خلاف ڪريڪ ڊائون ڪندي جسقم جي 2 اڳواڻن شريف ڪلھوڙو ۽ وزير ڪلھوڙو کي حراست ۾ وٺي ٿاڻي تي ويهاري ڇڏيو. پوليس موجب جسقم ڪارڪنن کي گرفتار ناهي ڪيو کين ٿاڻي تائين محدود ڪيو آهي.ٻئي طرف نوشهروفيروز پوليس ِ سن ويندڙ سنڌ يونائيٽيڊ پارٽي جي 4 اڳواڻن فرمان نول، سرواڻ جوکيو، سليمان شيخ ۽ علي نواز وسطڙو کي گرفتار ڪري لاڪ اپ ڪري ڇڏيو، گرفتاري کان بچي ويل ڪارڪنن جو چوڻ آهي ته پوليس سندن گاڏي کي روڪي بعد اڳواڻن کي کنڀي لاڪ اپ ۾ بند ڪيو آهي، هنن چيو ته اهو عمل اظهارِ راءِ ۽ سياسي آزاديءَ تي سڌي ضرب آهي هنن الزام هنيو ته پوليس طاقت جو غلط استعمال ڪندي سياسي سرگرمين کي دٻائڻ جي ڪوشش ڪري رهي آهي، هنن مطالبو ڪيو آهي ته گرفتار ڪارڪنن کي فوري طور آزاد ڪيو وڃي
| سڄي سنڌ ۾ گرفتاريون ڪيون ويون آهن: زين شاهه |
سن: سن ۾ سائين جي ايم سيد جي 122 سالگرھ جي موقعي تي ايس يوپي صدر سيد زين شاھ ٽائيم نيوز سان ڳالھائيندي چيو ته 8 فيبروري تي سڄو ملڪ بند ھوندو، سنڌ حڪومت ته اسان کي 28 نومبر تي به جلسو ڪرڻ ڪونه ٿي ڏنو اڄ به قلم 144 لاڳو آهي، سڄي سنڌ ۾ گرفتاريون به ٿيون آهن سنڌ حڪومت ڇا ڪندي ھي عاشقن جو ميلو آ سنڌ دوستن جو ميلو آ سنڌ حڪومت خود ڀاڙي تي آيل آهي.ھنن وٽ پنهنجو ڪو موقف به ڪونهي. 8 فيبروي رڳو سنڌ نه سڄو ملڪ بند ھوندو اسان ان لاء ماڻهن کي چونداسين، جيڪڏهن يڪجهتي ڪندو ته نظام تبديل ٿيندو. اسان وٽ ڪاروباري ماڻهوَ ھجي شاگرد ھجي سڄو سال ڪمايو پر پنهنجي وطن سنڌ جي وسيلن جي جيڪا ڦر لٽ ٿي آهي، ان مان نجات ڏيارڻ لاء 8 فيبروي تي ڦيٿا روڪ ۽ شٽر بند ھڙتال ڪريو.