سيف الله ابڙو پارٽي پوزيشن خلاف ووٽ ڏنو: پي ٽي آءِ  نااهلي لاءِ درخواست جمع ڪرائي ڇڏي

اسلام آباد (بيورو رپورٽ) تحريڪ انصاف سيف الله ابڙو جي نااهلي لاءِ چيئرمين سينيٽ سان رجوع ڪري ورتو. عون عباس بپي 63 اي تحت نااهلي لاءِ درخواست چيئرمين سيڪريٽريٽ وٽ جمع ڪرائي ڇڏي آهي. جنهن ۾ ڄاڻايو ويو آهي ته سيف الله ابڙو 27هين آئيني ترميم ۾ پارٽي پاليسي جي ابتڙ ووٽ ڏنو هو، هن پاڪستان تحريڪ انصاف جي پارلياماني پارٽي جو حصو رهيو آهي.27هين آئيني ترميم کان اڳ ميمبرن کي لکت ۾ آگاهه ڪيو ويو هو ته هو ان جي مخالفت ۾ ووٽ ڏين. واضح هدايت ڏني وئي ته 27هين آئيني ترميم جي حق ۾ ووٽ نه ڏنو وڃي. ميڊيا ۽ پارلياماني پارٽي جي ذريعي ميمبرن کي ٻڌايو ويو ته ترميم خلاف ووٽ ڏين. 2 ڊسمبر تي سيف الله ابڙو کي شوڪاز نوٽيس جاري ڪيو ويو هو. شوڪاز نوٽيس سيف الله ابڙو کي مليو، پر هن ڪو به جواب ناهي ڏنو. متن ۾ وڌيڪ چيو ويو آهي ته 63 اي تحت سينيٽر جي نااهلي لاءِ اليڪشن ڪميشن کي لکيو وڃي. هوڏانهن پي ٽي آءِ جي سينيٽر سيف الله ابڙو خلاف آئين جي آرٽيڪل 63 اي تحت انحراف جو ريفرنس چيئرمين سينيٽ ڏانهن سينيٽ ۾ پارلياماني ليڊر سينيٽر علي ظفر پاران به موڪليو ويو آهي. ٻئي طرف سينيٽر سيف الله ابڙو پارلياماني ليڊر علي ظفر ۽ عون عباس بپي تي الزام مڙهيندي چيو آهي ته بنيادي ڳالهه هي آهي ته پي ٽي آءِ 27هين آئيني ترميم جي مخالفت ئي نه ڪئي، علي ظفر جي قيادت کان بهتر آهي ته ماڻهو ڊي چوڪ تي وڃي ڌرڻو هڻي، علي ظفر قيادت ڪرڻ جي لائق ئي ناهي، عون عباس ته ڏکين ڏينهن ۾ پارٽي ڇڏي ڀڃي ويو هو مون بدترين حالتن باوجود پارٽي کي استعيفا نه ڏني.  هاڻ عون عباس بپي ڪيئن واپس آيو آهي. هن چيو ته نه پارٽي طرفان ڪو ليٽر جاري ٿيو، نه ئي مون کي ڪو شوڪاز نوٽيس يا خط مليو آهي. هي پارٽي هاڻي سوشل ميڊيا جي پارٽي بڻجي وئي آهي، سوشل ميڊيا تي پوسٽ ڪري ڇڏين ٿا، مون کي ڪجهه به موصول نه ٿيو.