اسلام آباد (بيورو رپورٽ) وفاقي آئيني عدالت ۾ سپر ٽيڪس بابت ڪيس جي ٻڌڻي چيف جسٽس امين الدين خان جي سربراهي ۾ ٽه رڪني بينچ ڪئي. ٻڌڻي دوران مختلف ڪمپنين جي وڪيل فروغ نسيم دليل ڏيندي ايف بي آر تي قانون ۾ پنهنجي مطلب جي تشريح ڪرڻ جو الزام لڳايو. عدالت وڌيڪ دليلن لاءِ ڪيس جي ٻڌڻي اڄ تائين ملتوي ڪري ڇڏي. وفاقي آئيني عدالت ۾ سپر ٽيڪس متعلق ڪيس جي ٻڌڻي چيف جسٽس امين الدين خان جي سربراهيءَ ۾ ٽه رڪني بينچ ڪئي. ٻڌني دوران مختلف ڪمپنين جي وڪيل فروغ نسيم لديل ڏيندي چيو ته آئين ۽ قانون ۾ ڪنهن به طرح پنهنجا لفظ شامل نٿا ڪري سگهجن. جڏهن ته ايف بي آر پنهنجي ئي ٺاهيل قائدن ۽ ضابطن جي من پسند تشريح ۽ لاڳو ڪري رهيو آهي. عدالت فروغ نسيم جا دليل مڪمل نه ٿيڻ تي ڪيس جي ٻڌڻي اڄ تائين ملتوي ڪندي هدايت ڪئي ته وڪيل ايندڙ ٻڌڻي تي به پنهنجا دليل جاري رکندو.
وزيراعظم پاران ريلوي جي ڪارڪردگي سڌارڻ لاءِ ماهرن سان مشاورت
اسلام آباد (بيورو رپورٽ) وزيراعظم شهباز شريف جي صدارت هيٺ پاڪستان ريلويز جي ڪارڪردگي کي وڌيڪ مؤثر بڻائڻ لاءِ نجي شعبي جي ماهرن سان مشاورتي اجلاس منقعد ٿيو. وزيراعظم پاڪستان ريلويز سڀني لاڳاپيل ادارن ۽ يونٽن سان بامقصد مشاورت کان پوءِ عملي قدمن تي ٻڌل روڊ ميپ ايندڙ هفتي پيش ڪرڻ جي لاڳاپيل اختيارين کي هدايت ڪئي. هن افسوس جو اظهار ڪندي چيو ته پاڪستان ريلويز متعلق ترقياتي ڪمن لاءِ حڪومتي فنڊز جي فراهمي کي ڏهاڪن تائين نظرانداز ڪيو ويو. ايندڙ سال جي پي ايس ڊي پي ۾ ريلويز جي ترقياتي منصوبن لاءِ متناسب بجيٽ رکيو ويندو. اجلاس ۾ وفاقي وزير ريلويز محمد حنيف عباسي، ناڻي واري وفاقي وزير محمد اورنگزيب، وفاقي وزير اطلاعات و نشريات عطاالله تارڙ، وفاقي وزير موسمياتي تبديلي مصدق ملڪ، اقتصادي معاملن واري وفاقي وزير احد خان چيما، وزيراعظم جي معاون خاص هارون اختر، نيشنل ڪوآرڊينيٽر ايس آءِ ايف سي ليفٽننٽ جنرل (رٽائرڊ) سرفراز احمد، لاڳاپيل وزارتن جي سيڪريٽرين، سرڪاري کاتن جي عملدارن ۽ نجي شعبي سان لاڳاپيل ماهر زيد بشير، پير سعد احسان الدين سميت ٻين شرڪت ڪئي.