سکر هاءِ ڪورٽ سرڪاري لائبريز بابت فنڊن جي رپورٽ طلب ڪري ورتي

سکر (بيورو رپورٽ) سنڌ هاءِ ڪورٽ سکر بئنچ جي جسٽس ذوالفقار علي سانگي ۽ جسٽس عبدالحامد ڀرڳڙي تي ٻڌل ٻه رڪني آئيني بينچ سرڪاري لائبريرين جي بحالي بابت درخواستن تي لکت ۾ آرڊر جاري ڪري ڇڏيو. عدالت سرڪاري کاتن جي ڪارڪردگي تي سخت ناراضگي جو اظهار ڪندي ڊي جي لائبريري کي ذاتي حيثيت ۾ 22 ڊسمبر تي طلب ڪري ورتو. لائبريريز بابت ڊپٽي ڪمشنر سکر، گھوٽڪي، نوشهرو فيروز ۽ خيرپور جي رپورٽن کي عدالت غير سنجيده قرار ڏئي ڇڏيو. سرڪاري لائبريرين جا مسئلا ڏهاڪي کان حل طلب آهن. لائبريرين ۾ سولر، ڪمپيوٽر، انٽرنيٽ ۽ ڪتابن جي کوٽ آهي. لکت واري آرڊر ۾ عدالت وڌيڪ چيو آهي ته ٻهراڙين ۾ لائبريرين جي حالت انتهائي خراب آهي جيڪو عمل سرڪاري لاپرواهي ظاهر ڪري ٿو. هر لائبريري بابت تعلقي سطح تي اڳ ۽ موجوده حالتن متعلق جامع رپورٽ ڊائريڪٽر جنرل لائبريريز کي ذاتي طور پيش ٿي جمع ڪرائي. عدالت فنانس سيڪريٽري کان بجيٽ ۽ فنڊن بابت جامع رپورٽ طلب ڪري ورتي آهي. عدالتي حڪمن تي عمل نه ڪرڻ جي صورت ۾ ذميوار خلاف توهين عدالت جي ڪارروائي ڪئي ويندي.