| سکر: ڪڻڪ خريداري ڪرپشن: 2 عملدارن جي ضمانت رد: هڪ فرار |
سکر (بيورو رپورٽ) ڪڻڪ جي خريد فروخت ۾ خرد برد وارو ميگا اسڪينڊل، سکر جي احتساب عدالت پاران خوراڪ کاتي لاڙڪاڻو جي اڳوڻي ڊپٽي ڊائريڪٽر ۽ قمبر جي اڳوڻي ڊسٽرڪٽ فوڊ ڪنٽرول مير الطاف مگسيءَ جي جي ضمانت رد ڪري ڇڏي. نيب اڳوڻي ڊپٽي ڊائريڪٽر نصر الله چانڊيو کي ضمانت رد ٿيڻ تي گرفتار ڪري ورتو. جڏهن ته اڳوڻو ڊسٽرڪٽ فوڊ ڪنٽرولر مير الطاف مگسي عدالت مان فرار ٿي ويو. مليل ڄاڻ موجب نيب پاران نصر الله چانڊيو ۽ الطاف مگسي سميت 21 جوابدارن خلاف 5 ارب 74 ڪروڙ 9 لک 52 هزار رپين جو احتساب عدالت ۾ ريفرنس داخل ڪرايل آهي. سمورا جوابدار ڪچي ضمانت تي آزاد هئا. احتساب عدالت اڳوڻي ڊپٽي ڊائريڪٽر نصر الله چانڊيو ۽ اڳوڻي ڊسٽرڪٽ فوڊ ڪنٽرولر جي ضمانت رد ڪري ڇڏي، موقعي تان نصرالله چانڊيو کي گرفتار ڪيو ويو، جنهن کي نيب مطابق ريمانڊ لاءِ عدالت ۾ پيش ڪيو ويندو. جوابدارن ڪڻڪ جي خريداري لاءِ 2022 جي پاليسيءَ جي ابتڙ اڳواٽ ادائيگي ڪئي. جوابدارن جي ملي ڀڳت سان قومي خزاني کي ساڍا پنج ارب رپين کان وڌيڪ جو نقصان پهتو آهي.