| سکر ۾ عورت فوت، مڙس ۽ ڏير تي تشدد ڪري مارڻ جا الزام، لاش رکي ڌرڻو |
سکر (بيورو رپورٽ) سکر جي رهواسڻ کي مبينا طور تي تشدد بعد فنائل پيئاري مارڻ جو الزام، لاش رکي ڌرڻو، شهر جي رهواسڻ ڇهن ٻارن جي ماءٌ مسمات زهرا ملاح جي مبينا قتل خلاف وارثن ۽ برادري جي ماڻهن پريس ڪلب آڏو لاش رکي احتجاجي مظاهرو ڪيو ويو. مبينا طور قتل ڪيل عورت جي والد محمد رمضان ملاح خاندان جي ماڻهن محمد شاهين، شهزاد، محمد رفيق ۽ ٻين سان گڏجي دانهيو آهي ته بندر روڊ باغ حيات جي رهواسي حنيف ملاح سان 32 سال اڳ نياڻي جي شادي ڪرائي، جيڪو ڌيءَ کي مسلسل تشدد، ذهني اذيت ۽ والدين سان ملڻ کان روڪيندو هيو. هن الزام مڙهيندي چيو ته محمد حنيف پنهنجي ڀاءٌ سان گڏجي منهنجي نياڻي زهره کي سخت تشدد جو نشانو بڻائي زبردستي فنائل پيئاري قتل ڪيو آهي، عورت جي پٽ شھزاد حنيف الزام مڙهيندي چيو ته والده کي زبردستي فنائل پياريو ويو، جسم تي تشدد جا نشان موجود هئا. عورت جي ڏير محمد رفيق ملاح الزام مڙهيندي چيو ته هن ڪيترائي ڀيرا پنهنجي ڀائرن کي ڀاڄائي مان تشدد کان روڪيو هيو، جوابدارن خلاف ڪارروائي ڪري انصاف ڪيو وڃي.