سکر ۾ پ پ کي هارائيندڙ پي ٽي آءِ اڳواڻ محمد علي چوهاڻ گرفتار

سکر(بيورو رپورٽ) سکر ۾ پ پ کي يونين ڪميٽي تي شڪست  ڏيندڙ تحريڪ انصاف سکر جو اڳواڻ محمد علي چوهاڻ کي پوليس گرفتار  ڪري ورتو آهي

گرفتار پي ٽي آءِ اڳواڻ جي ڀاءُ احمد علي چوهاڻ موجب صبح جي وقت پوليس ۽ سادا ڪپڙا پهريل ماڻهو ڀاءُ کي گرفتار ڪري کڻي ويا آهن

هن ٻڌايو ته پاڙي وارن جي سامهون ڀاءُ کان موبائيل فون کسي کيس گرفتار ڪيو ويو، حد جي سي سيڪشن پوليس سميت مختلف ٿاڻن جا چڪر ڪاٽيا آهن پوليس ڪجهه به ٻڌائڻ لاءِ تيار ناهي

احمد علي چوهاڻ جو چوڻ هو ته گهر ڀاتي توڙي علائقي واسي محمد علي چوهاڻ جي اوچتو بنا جواز گرفتاري بعد گم ڪرڻ واري عمل تي پريشان آهن

ٻئي طرف محمد علي چوهاڻ کي مبينا گرفتاري بعد گم ڪرڻ واري اطلاع تي تحريڪ انصاف جا اڳواڻ به پهچي ويا

محمد علي چوهاڻ مڪاني چونڊن ۾ تحريڪ انصاف جي سيٽ تان يونين ڪاميٽي ٽي تان پ پ اميدوار کي شڪست ڏئي ڪامياب ٿيو هو ۽ سکر ميونسپل ڪارپورشن ۾ مخالف ڌر جو سرگرم ميمبر آهي