سکر: 8 ڪروڙ خرچ باوجود ايم آر آءِ مشين هفتي اندر خراب: عدالت پاران ڪاوڙ

سکر (رپورٽ: فاروق سومرو) ايم آر آءِ جي مرمت تي 8 ڪروڙ خرچ ٿيڻ باوجود هڪ هفتي ۾ خراب ٿيڻ جو انڪشاف، سنڌ هاءِ ڪورٽ سکر بينچ پاران سخت ڪاوڙ جو اظهار، سنڌ جي سرڪاري اسپتالن ۾ سهولتن جي اڻاٺ، مريضن کي دوائن نه ملڻ، ليبارٽري ٽيسٽ ۽ ٻين مفت سهولتن جي کوٽ خلاف سنڌ هاءِ ڪورٽ سکر جسٽس ذوالفقار علي سانگي ۽ جسٽس عبدالحامد ڀرڳڙي تي مشتمل ٻه رڪني بينچ ٻڌڻي ڪئي. طلب ڪرڻ تي سيڪريٽري صحت ريحان اقبال بلوچ، غلام محمد مهر ميڊيڪل ٽيچنگ اسپتال جي ايم ايس ۽ ميڊيڪل ڪاليج سکر جو پرنسپال پيش ٿيا. درخواست گذارن جي وڪيل ايڊووڪيٽ شبير شر دليل ڏيندي عدالت کي ٻڌايو ته ڊاڪٽر ڊيوٽي تان غائب هوندا آهن ۽ اسپتالن جون مشينون به خراب آهن، غلام محمد مهر ٽيچنگ اسپتال سکر جي ايم آر آءِ مشين ٽن سالن کان پوءِ مرمت ڪرائڻ بعد صرف هڪ هفتي ۾ ٻيهر خراب ٿي وئي. عدالت سيڪريٽري صحت کان پڇاڻو ڪيو ته مرمت تي ڪيترو خرچ آيو، جنهن تي سيڪريٽري ٻڌايو ته 8 ڪروڙ رپيا خرچ ٿيا آهن، 2023 ۾ ايم آر آءِ مشين جي مرمت جو ٽينڊر ٿيو هو، 2025 ۾ 8 ڪروڙ رپين سان مشين جي مرمت مڪمل ڪئي وئي. مون کي اڄ ئي هن صورتحال بابت ڄاڻ ملي آهي، ۽ معاملي جي انڪوائري ڪرائي پئي وڃي. مشين جو ايمپليفائر خراب ٿي ويو آهي ۽ ان کي ٺيڪ ٿيڻ ۾ 20 کان 25 ڏينهن لڳي سگهن ٿا. تربيت يافته عملي جي کوٽ سبب مشينري بار بار خراب ٿي رهي آهي.جسٽس ذوالفقار علي سانگي ريمارڪس ڏيندي چيو ته وارنٽي ورتي وئي هئي، جنهن تي سيڪريٽري ٻڌايو ته نه. جنهن تي عدالت ريمارڪس ڏيندي چيو ته هڪ هزار رپين جي شي خريد ڪرڻ وقت به ماڻهو وارنٽي وٺندا آهن، ڇو نه معاملي جي نيب کان انڪوائري ڪرائي وڃي. سيڪريٽري صحت ميڊيا سان ڳالهائڻ کان انڪار ڪيو ۽ صحافين کي به ڪنهن سوال جو جواب نه ڏنو. عدالت ۾ به سيڪريٽري صحت ڪو به اطمينان بخش جواب نه ڏئي سگهيو، جنهن تي عدالت فيصلو محفوظ ڪري ورتو.