سکر_حيدرآباد موٽروي نه ٺهڻ تي ڪاوڙ: اوهان سنڌ ۾ روڊ نه ٺاهيو ڀل ماڻهو مرندا رهن: سنڌ هاءِ ڪورٽ

سکر (بيورو رپورٽ) سنڌ هاءِ ڪورٽ سکر بينچ مهراڻ هاءِ وي تي هيوي ٽريفڪ جي روڪٿام واري هدايت تي عمل نه ٿيڻ ۽ سکر حيدرآباد موٽر وي تي ڪم شروع نه ٿيڻ تي ڪاوڙ جو اظهار ڪندي ڊي آءِ جي سکر ۽ شهيد بينظير آباد کي شوڪاز نوٽيس جاري ڪري ڇڏيا. عدالت وفاقي سيڪريٽري ڪميونيڪشن کي به ايندڙ ٻڌڻيءَ تي طلب ڪندي رپورٽ طلب ڪري ورتي. سنڌ هاءِ ڪورٽ سکر جي جسٽس ذوالفقار علي سانگي ۽ جسٽس عبدالحامد ڀرڳڙي تي ٻڌل ٻه ٻه رڪني بينچ مهراڻ هاءِ وي تي هيوي ٽريفڪ جي روڪٿام بابت داخل ڪيس جي ٻڌڻي ڪئي عدالت ۾ اين ايچ اي عملدار، ڊي آءِ جي سکر، ڊي آءِ جي شهيد بينظير آباد، ايڊيشنل ايڊووڪيٽ جنرل سنڌ علي رضا بلوچ، درخواستگذار مهتاب شر، فقير اطهر ابڙو، سهيل احمد کوسو ٻيا پيش ٿيا. سنڌ هاءِ ڪورٽ سکر بينچ جي جسٽس ذوالفقار علي سانگي سکر حيدر آباد موٽروي ڪم شروع نه ڪرڻ تي ڪاوڙ جو اظهار ڪندي ريمارڪس ڏنا آهن ته اوهان سنڌ ۾ روڊ نه ٺاهيو ڀل ماڻهو مرندا رهن، اوهان کي فرق نٿو پوي.  عدالت وفاقي سيڪريٽري ڪميونيڪيشن کي ايندڙ ٻڌڻي تي روبرو پيش ٿيڻ لاءِ نوٽيس جاري ڪري ڇڏيا.  وڪيل همايون شيخ عدالت کي اگاهي ڏني ته ايندڙ جون يا جولاءِ تائين سکر حيدر آباد موٽروي جو ڪم شروع ڪيو ويندو.  جسٽس ذوالفقار علي سانگي ريمارڪس ڏنا ته اين ايچ اي چيئرمين اڳ لکت ۾ ڏنو هو ته هڪ مهيني اندر سکر حيدر آباد موٽروي ڪم شروع ڪيو ويندو. عدالت کي ٻڌايو ويو ته اين ايچ اي چيئرمين ۽ سنڌ جو ميمبر مقرر ناهن ٿي سگهيا، جنهن تي عدالت ريمارڪس ڏنا ته  مطلب بنا چيئرمين ۽ سنڌ ميمبر جي اين ايچ اي هلي رهيو آهي.  سنڌ هاءِ ڪورٽ سکر بينچ مهراڻ هاءِ وي تي هيوي ٽريفڪ جي روڪٿام واري هدايت تي عمل نه ٿيڻ تي به ڪاوڙ جو اظهار ڪيو.  عدالت پاران ڊي آءِ جي سکر، ڊي آءِ جي شهيد بينظير آباد جا شوڪاز نوٽيس جاري ڪري ڇڏيا. عدالت پاران سٽي باءِ پاس وٽ يوٽرن ٺاهڻ ۽ سروس روڊ جو ڪم نه ٿيڻ تي ڪاوڙ جو اظهار ڪيو، گاڏيون هٽائڻ ۽ حددخليون هٽائڻ جو حڪم ڏيندي ڪيس جي ٻڌڻي ملتوي ڪري ڇڏي.