شام تان پابنديون ختم،ٽرمپ ايگزيڪيوٽو آرڊر تي صحيح ڪري ڇڏي

واشنگٽن(پنهنجي ڊيسڪ) آمريڪا شام تان اقتصادي پابنديون ختم ڪري ڇڏيون.آمريڪي صدر ڊونلڊ ٽرمپ شام تي پابنديون هٽائڻ جي ايگزيڪيوٽو آرڊر تي صحيح ڪري ڇڏي آهي.

ان کان اڳ آمريڪي پرڏيهي کاتي جي ترجمان چيو هو ته 2004 ۾ شام تي لاڳو ڪيل پابنديون، جيڪي شام جي سرڪاري اثاثن کي منجمد ڪري ڇڏيون هيون، ختم ڪيون وينديون.جڏهن ته ترجمان چيو ته شام ​​جي اڳوڻي صدر بشار الاسد، داعش ۽ ايراني اتحادين تي پابنديون برقرار رهنديون.

ان کان علاوه هڪ سينئر آمريڪي عهديدار چيو ته آمريڪا شام کي دهشتگردي جي سرپرست رياست طور نامزد ڪرڻ جي فيصلي جو جائزو وٺي رهيو آهي. آمريڪي قدم شام جي عالمي مالي اڪيلائي کي ختم ڪندو. اهو شام لاءِ عالمي واپار ۽ سيڙپڪاري لاءِ نوان دروازا کولڻ جو امڪان آهي.

شام جي پرڏيهي وزير آمريڪي فيصلي جو استقبال ڪيو ۽ چيو ته پابنديون هٽائڻ سان شام عالمي برادري لاءِ کليل هوندو، پابنديون ختم ڪرڻ سان تعمير نو ۽ ترقي جو رستو هموار ٿيندو ۽ پابنديون هٽائڻ سان معاشي بحالي ۾ رڪاوٽون ختم ٿينديون.ياد رهي ته مئي ۾ شام جي عبوري صدر احمد الشرع سعودي عرب ۾ آمريڪي صدر ڊونلڊ ٽرمپ سان ملاقات ڪئي هئي.

رپورٽ موجب ڊونلڊ ٽرمپ ۽ احمد الشرع جي وچ ۾ ملاقات اهم هئي ڇاڪاڻ ته اها 25 سالن ۾ شام ۽ آمريڪي سربراهن جي وچ ۾ پهرين اهڙي ملاقات هئي.

ملاقات کان پوءِ آمريڪي صدر ڊونلڊ ٽرمپ شام تي پابنديون هٽائڻ جو حڪم ڏنو.