شاھ عبداللطيف يونيورسٽي خيرپور اتر سنڌ جي معروف جنڪشن يونيورسٽي آهي، جيڪا بلوچستان، پنجاب ۽ سنڌ جي سرحدن کي ڳنڍي مختلف علائقن جي شاگردن کي پاڻ ۾ جوڙي تعليم سان روشناس ڪرائي ٿي. هر سال هزارين شاگرد تعليمي مهارت جي هن مرڪز ڏانهن خوشحال مستقبل جي نت نون خوابن ۽ اميدن ۽ آسن سان گڏ ايندا آهن ۽ چار سال پڙھي ھن درس گاھ مان علم واري اڃ اجهائي، خوب مستي ڪري آخر ڊسمبر واري مھيني ۾ وڇوڙي جا ورلاپ ڪري الوداع ڪري ويندا آھن. ۽ پنھنجن خوابن سان گڏ نه صرف ڊگريون ۽ سندون بلڪ گڏوگڏ خيرپور ۽ شاھ لطيف يونيورسٽي جون يادون به کڻي ويندا آھن.
شاھ عبداللطيف يونيورسٽي خيرپور جي آخري سال جي شاگردن لاءِ الوداعي تقريبون سندن علمي سفر جي پڄاڻيءَ کي يادگار بڻائڻ لاءِ ترتيب ڏنيون وڃن ٿيون. ھن سال واري الوداعي تقريب جي شروعات روايتي واڪ ڊائون ميموري لين سان ٿي، جنھن ۾ آخري سال جي شاگردن پنهنجي تعليمي سفر جي قصن، ڪاميابين ۽ تعريفي لمحن کي ھڪ ٻئي سان ۽ پنھنجي اداري جي استادن ۽ انتظاميا سان ونڊيو. اھو تصويرن ۽ وڊيوز جو هڪ سلسلو آھي، جيڪو ھميشه يونيورسٽيءَ جي يادن ۽ تاريخ جو حصو ۽ شاگردن جي جذبن ۽ امنگن ۾ شامل رھندو.
الوداعي تقريب جو هڪ اهم پاسو شاگردن جي وچ ۾ ذاتي ڊائري جي مٽاسٽا به آهي. هر شاگرد پنهنجي ساٿين لاءِ شڪرگذاري، تعريف ۽ يادگيريءَ جو دل جي گھرائين سان اظهار ڪندي پاتل شرٽس تي آٽوگراف ۽ نوٽس لکيا. دستخطن ۽ نيڪ تمنائن سان سينگاريل ڊائريون، گڏيل تجربن جو نمونو بڻجي ويون. هڪ روايت جيڪا موڪلاڻيءَ جي مترادف بڻجي وئي آهي، شاگردن هڪ ٻئي جي شرٽس تي ذاتي پيغام لکيا. رنگن ۽ پيغامن جي متحرڪ صف ۾ مزاح ۽ مذاق سميت پنھنجي دوستيءَ جو اخلاص سان اظهار ڪيائون. قميصون، جيڪي هاڻي يادن سان سينگاريل آهن، ان موقعي جي روح کي ڍڪيندڙ پائڻ لائق ڪئنواسن جو ڪم ڪيو.
موسيقيءَ جي محفل ۾ جڏھن ڄاڻو توڙي غير پيشہ ور پر باصلاحيتن شاگردن پنھنجي جذبن کي الوداعي گيتن جي طور تي پيش ڪيو ته ماحول ڪي قدر سوگوار ٿي ويو. انھي دوران هنن نه صرف موسيقيءَ جي طور طريقن جي جذباتي نزاڪتن جي عڪاسي ڪئي پر لچڪ، دوستيءَ انھن گڏيل تجربن کي به پيش ڪيو ويو، جيڪي يونيورسٽي ۾ سندن موجودگي کي يادگار ۽ قابل ذڪر بڻائين ٿا. تقريب ۾ ڪيترائي جذباتي منظر ڏسڻ ۾ آيا. جذبات جاڳي پيا، ڳوڙها وھايا ويا، ڀاڪر پاتا ويا ۽ دل جي گهراين سان ھڪ ٻئي کي رخصت ڪيو ويو. انھيءَ موقعي تي هر فرد ئي پنهنجي ساٿين جي علمي ۽ ذاتي ترقي جي اميد ڏيکاري ۽ ڪاميابي ۽ ڪامراني جي دعا ڪئي. زولاجي شعبي جي شاگردن ۽ شاگردياڻين سي آر نور احمد نوناري، مھتاب علي، مطلوب احمد، محمد سليم، مريم، حرمت سوبيا، سدرہ ۽ ٻين اجتماعي طور تي عزم ڪيو ته هو پنهنجي تعليم ۽ صلاحيتن کي پنهنجي قوم جي بهتري لاءِ استعمال ڪندا. انھيءَ موقعي تي سماجي ذميواري جي احساس کي فروغ ڏيارڻ لاءِ ته جيئن اھي پنھنجي زندگين ۾ ايندڙ دور ۾ ڪاميابيءَ سان ھم ڪنار ٿين، يونيورسٽي طرفان قائم ڪيل قدرن کي برقرار رکڻ جو پختو عزم ڪيو ويو. ان ريت ھن ڀيري به شاھ عبداللطيف يونيورسٽي خيرپور ۾ الوداعي سرگرميون روايتي رسمن کان مٿانهيون ٿي ويون ۽ جذبن، يادن ۽ گڏيل اميدن جي هڪ ٽيپيسٽري ٺاهي ڇڏيائون.
آخري سال جي شاگردن کلندي کيڏندي، ڳائيندي وڄائيندي ۽ پاڻ ۾ رابطن برقرار رکڻ جي پختن قولن ۽ قرارن جي گونجار ۾ ھڪ ٻئي کان موڪلايو ۽ پنھنجي پنھنجي منزل ڏانھن رخ رکيائون ته پنھنجو ۽ پنھنجي ديس جو مستقبل روشن ڪري ڏيکارين.