شهدادپور:  ماستر کان 2 ڪروڙ ڀتو طلب: جوابدار ٿاڻي ۾ فوت

شهدادپور (رپورٽ: عبدالحميد کوسو ) شهدادپور ۾ پرائمري استاد کان 2 ڪروڙ ڀتو طلب، رقم نه ڏيڻ جي صورت ۾ 4 پٽن سوڌو قتل جي ڌمڪي، گهر تي فائرنگ، هراسيل  ڀاتي گهر تائين محدود، پوليس مقرر، ان ڏس ۾ شهر جي ڳتيل آبادي واري علائقي محمدي ٽائون جي رهواسي پرائمري استاد رياض عرف نديم ميتلو کي 2 ڪروڙ رپين جي  ڀتي جي پرچي ملڻ جو انڪشاف سامهون آيو، ڀتو نه ڏيڻ جي صورت ۾ خاندان سميت قتل ڪرڻ جي ڌمڪي ڏني وئي آهي، ڀتي واري پرچي ملڻ بعد گذريل ڏينهن استاد جي گهر تي هوائي فائرنگ ڪئي وئي. ڀتي واري پرچي ۾ لکيل آهي ته “2 ڪروڙ رپيا ڏي، ٻي صورت ۾ موت لاءِ تيار ٿي وڃ” ، ڀتا پرچي موڪليندڙ واضح ڪيو ته جيڪڏهن پوليس کي آگاهه ڪيو ته نديم ميتلو کي سندس چئن ٻارن سوڌو قتل ڪيو ويندو. اهڙين ڌمڪين بعد متاثره خاندان خوف وچان گهران نڪرڻ ڇڏي ڏنو آهي، ٻئي طرف استاد  نديم ميتلي ٻڌايو ته 3 نومبر تي 2 ڪروڙ ڀتي لاءِ پرچي ملڻ جي چئن ڏينهن بعد بعد اڻڄاتل نمبر تان پيغام آيا، جن ۾ اڳ ۾ گهريل 2 ڪروڙ رپين کي گهٽائي 50 لک رپيا ڀتو ڏيڻ جو مطالبو ڪيو ويو، پئسا نه ڏيڻ جي صورت ۾ سنگين نتيجا ڀوڳڻ جون ڌمڪيون ڏنيون ويون، نديم ميتلي موجب استادي پيشي سان گڏ 26 ايڪڙن جو زميندار پڻ آهيان، گذريل ڏينهن گهر جي مک دروازي تي فائرنگ ڪئي وئي پر گهر ڀاتي معجزاڻي طور محفوظ رهيا. هن چيو ته ڌمڪين بعد اسڪول وڃي نٿو  سگهان،  يونيورسٽي پڙهندڙ پُٽ ۽ مدرسي ويندڙ ڌيءُ خوف سبب ٻاهر نڪرڻ کان قاصر آهن. هن مطالبو ڪيو ته ڀتا خورن کي گرفتار ڪري تحفظ ڏنو وڃي، رات دير سان رياض عرف نديم ميتلي کان ڀتو گهرڻ واري پرچي موڪلڻ واري معاملي تان پڇا ڳاڇا لاءِ حراست ۾ ورتل  بخاري پاڙي واسي ڄام عزيز جکرو پوليس ڪسٽڊي ۾ دم ڏئي ڇڏيو، پوليس ڳجهه ڳوهه ۾ لاش سِمس اسپتال ۾ ڦٽو ڪري فرار ٿي وئي، فوتي جي ڀاءُ حيدر جکري الزام هنيو ته ڀاءُ عزيز کي پوليس پڇا ڳاڇا لاءِ ٿاڻي تي گهرايو،  جتي ايس ايچ او آزادي لاءَ رشوت طلب ڪئي، رشوت نه ڏيڻ تان ايس ايچ او ڀاءُ تي بيرحماڻو تشدد ڪري قتل ڪيو  آهي. هن چيو ته ڀاءُ جي قتل ۾ ميتلا برادري به شامل آهي. هن انصاف جي اپيل ڪئي