صحت کاتو رڳو 17 سيڪڙو ترقياتي فنڊ خرچي سگهيو: 16 وڏيون رٿائون مڪمل ڪرڻ جو حڪم      

ڪراچي (اسٽاف رپورٽر) سنڌ جي وڏي وزير سيد مراد شاهه صحت کاتي کي هدايت ڪئي آهي ته 16 فليگ شپ منصوبن تي ڪم جي رفتار تيز ڪئي وڃي. ڪالهه ٿيل اجلاس ۾  صحت کاتي سالياني ترقياتي پروگرام 2025-26ع جي 45.37اب جي 178 اسڪيمَن بابت بريفنگ ڏني، جن مان 140 جاري ۽ 38 نيون اسڪيمون آهن، صحت واري وزير  ڊاڪٽر عذرا پيچوهو ٻڌايو ته 17 نومبر  تائين رڳو 21 سيڪُڙو فنڊ  استعمال ڪيا ويا آهن، اجلاس ۾ وڏي وزير  صوبائي فليگ شپ منصوبن جو جائزو وٺندي سڀني کاتن کي هدايت ڪئي ته ڪم جي رفتار وڌائي وڃي،  هلندڙ مالي سال دوران انهن کي مڪمل ٿيڻ کي يقيني بڻايو وڃي، اجلاس کي ٻڌايو ويو ته دولت پور صفن جي حادثاتي ۽ ايمرجنسي سينٽر لاءِ 100 سيڪڙو فنڊ جاري ٿي چڪا آهن، اهو 30 جون کان اڳ فنڪشنل ٿيندو، ساڳئي ريت گهوڙاٻاري جي نئين تعلقي هيڊڪوارٽر اسپتال کي 30 تائين مڪمل ڪيو ويندو اجلاس ۾ صوبن جي 5 وڏين اسپتالن ۾ سول اسپتال ڪراچي، لياقت يونيورسٽي اسپتال حيدرآباد، سي ايم سي اسپتال لاڙڪاڻو، انسٽيٽيوٽ آف مدر اينڊ چائلڊ هيلٿ نوابشاهه ۽ جي ايم ايم سي اسپتال سکر ۾ ماڊيولر آپريٽنگ ٿيٽرز قائم ڪرڻ جو جائزو ورتو ويو، اهي رٿائون به 30 تائين مڪمل ٿينديون، ڳڙهي خدا بخش ڀٽو جي 50 بسترن واري رورل هيلٿ سينٽر کي 30 جون تائين مڪمل ڪيو ويندو، اجلاس ٻڌايو ويو ته خيرپور، بدين ۽ شڪارپور جي ضلعي هيڊڪوارٽر اسپتالن جي توسيع ۽ بهتري جو ڪم جاري آهي، جيڪو  30جون تائين مڪمل ٿي ويندو، ماتلي، قمبر ۽ عمرڪوٽ جي تعلقي هيڊڪوارٽر اسپتالن کي ضلعي هيڊڪوارٽر سطح تي اپ گريڊ ڪرڻ وارين منصوبن کي 30 جون تائين مڪمل ڪبو، اجلاس ۾ وزيراعليٰ لاڙڪاڻي ۾ 600 بسترن جي اسپتال جي تعمير جي منظوري ڏئي فائل ناڻي ۽ پلاننگ اينڊ ڊولپمينٽ ڏانهن اماڻي ڇڏي آهي، صحت کاتو انهي رٿا لاءِ پراجيڪٽ ڊائريڪٽر مقرر ڪندو.