صدر آرمي، ايئرفورس ۽ نيوي ترميمي ايڪٽ تي صحيح ڪري ڇڏي: عاصم منير چيف آف ڊفينس فورس ٿيندو

اسلام آباد(بيورو رپورٽ) صدر آصف علي زرداري پاڪستان آرمي (ترميمي) بل 2025ع، پاڪستان ايئر فورس (ترميمي) بِل 2025ع ۽ پاڪستان نيوي (ترميمي) بِل 2025ع جي منظوري ڏئي ڇڏي آهي، صدر قومي پارليامينٽ مان منظور ڪيل چئني قانونن تي صحيح ڪري ڇڏي آهي، صدر جي منظوري کان پوءِ چارئي قانون ايڪٽ آف پارليمينٽ بڻجي ويا آهن. آرمي ايڪٽ ۾ ڪيل ترميمن موجب آرمي چيف فيلڊ مارشل عاصم منير چيف آف ڊيفنس فورسز هوندو، چيف آف ڊيفنس فورسز جي مدت اُن ڏينهن کان شروع ٿيندي، جنهن ڏينهن نوٽيفڪيشن جاري ٿيندو، جڏهن ته جنرل کي فيلڊ مارشل جي عهدي تي ترقي ڏني ويندي ته ذيلي سيڪشن 2 تحت خدمتون انجام ڏيندو، وفاقي حڪومت آرمي چيف (چيف آف ڊيفنس فورسز) جا فرض ۽ ذميوارين جو تعين ڪندي. بل جي متن ۾ چيو ويو آهي ته آرمي ايڪٽ جي ڪلاز 8 جي ۾ به ترميم بعد چيئرمين جوائنٽ چيفس آف اسٽاف ڪميٽي جو عهدو 27 نومبر 2025ع کان ختم تصور ڪيو ويندو،آرمي چيف ۽ چيف آف ڊيفنس فورسز جي سفارش تي وزيراعظم ٽن سالن لاءِ ڪمانڊر آف نيشنل اسٽرٽيچڪ ڪمانڊ جو تقرر ڪندو، ڪمانڊر نيشنل اسٽرٽيچڪ ڪمانڊ جون شرطون، قاعدن ۽ ضابطن جو تعين وزيراعظم ڪندو. بل جي متن ۾ چيو ويو آهي ته وزيراعظم چيف آف ڊيفنس فورسز جي سفارش تي ڪمانڊر نيشنل اسٽرٽيچڪ ڪمانڊ کي وڌيڪ ٽن سالن لاءِ ٻيهر مقرر به ڪري سگهندو، ۽ هن ٻيهر مقرري يا توسيع کي ڪنهن به عدالت ۾ چئلينج نه ڪري سگهندو، بل جي متن ۾ وڌيڪ چيو ويو آهي ته آرمي ايڪٽ ۾ ريٽائرمنٽ جي عمر، سروس جي مدي ۽ هٽائڻ جا قانون ڪمانڊر نيشنل اسٽرٽيچڪ ڪمانڊ تي لاڳو نه هوندو، ڪمانڊر نيشنل اسٽرٽيچڪ ڪمانڊ بطور جنرل پاڪستان آرمي ۾ پنهنجون خدمتون سرانجام ڏيندو.