| عدالتون رڪارڊ جون محتاج هجن ٿيون، ڪمزور ڪيسن سبب اصل ڏوهاري بچي وڃي ٿو: سپريم ڪورٽ |
اسلام آباد(بيورو رپورٽ) فائرنگ ڪيس ۾ جسٽس جمال مندوخيل ريمارڪس ڏنا ته ناقص ۽ ڪمزور ڪيسن سبب اصل ڏوهاري بچي وڃي ٿو، ڇاڪاڻ ته عدالتون رڪارڊ جون محتاج هونديون آهن ۽ شڪ جو فائدو هميشه جوابدار کي ملي ٿو. پوءِ الزام عدالتن تي اچي ٿو ته اهي جوابدارن کي ڇڏي ڏين ٿيون. سپريم ڪورٽ ۾ مخالف ڌر کي زخمي ڪرڻ واري ڪيس ۾ جوابدار عبدالستار جي ضمانت واري درخواست تي جسٽس جمال مندوخيل ۽ جسٽس مسرت هلالي تي ٻڌل ٻه رڪني بينچ ٻڌڻي ڪئي. درخواستگذار جي وڪيل دليل ڏيندي چيو ته جوابدار عبدالستار ارشاد نالي شخص تي ٻه فائر ڪيا، جڏهن ته ٽي جوابدار فائرنگ ڪري رهيا هئا، ۽ عبدالستار جا فائر لڳا. جسٽس جمال مندوخيل سوال اٿاريو ته ڪهڙي جوابدار جو فائر ڪهڙي ماڻهو کي لڳو ۽ ايتري ماڻهن جي هجوم ۾ ڪيئن معلوم ٿيو. پوليس اهڙا ڪيس پاڻ خراب ڪري ٿي. جسٽس مسرت هلالي چيو ته يعني سامهون قتل ٿيو ۽ گولي هڻڻ واري جو نٿو ٻڌائي سگهجي ۽ سوال ڪيو ويو ته درخواستگذار سامهون بيهي گوليون ڳڻي رهيو هو. عدالت پنجاب پوليس طرفان ڪيسن جي داخل ٿيڻ تي سخت ريمارڪس ڏيندي چيو ته صرف پنجاب ۾ ڪيسن ۾ گولين جو تعداد لکيو ويندو آهي. اهڙن ناقص ڪيسن سبب اصل ڏوهاري بچي نڪري ٿو، ڇو ته عدالتون رڪارڊ جون محتاج آهن ۽ شڪ جو فائدو جوابدار کي ملي ٿو، پوءِ الزام عدالتن تي اچي ٿو ته اهي جوابدارن کي ڇڏي ڏين ٿيون. جڏهن ته پنجاب پوليس کي ڪيسن ۾ سچ لکڻ گهرجي، ڇو ته ڏوهه هڪ ماڻهو ڪري ٿو ۽ نامزد پورو خاندان ٿي وڃي ٿو. جسٽس مسرت هلالي به نشاندهي ڪئي ته پنجاب جا گهڻا ڪيس ساڳئي طرح جا لکيل هوندا آهن. دليل مڪمل ٿيڻ بعد عدالت جوابدار عبدالستار جي ضمانت منظور ڪري ورتي.