علي ظفر پاران نئون نعتيه ڪلام “سوهنا نبي صه” جاري

لاهور (ڪلچرل ڊيسڪ) پاڪستان جي مشهور ڳائڻي علي ظفر هڪ نئون نعتيه ڪلام ‘سوهنا نبي صه’ جاري ڪيو آهي. علي ظفر ‘سوهنا نبي’ ذريعي نبي ڪريم ﷺ سان پنهنجي عقيدت ۽ محبت جو اظهار ڪيو آهي. ڳائڻي پنهنجي سوشل اڪائونٽ انسٽاگرام تي نعتيه ڪلام جي وڊيو شيئر ڪئي. وڊيو جي ڪيپشن ۾ هن لکيو ته “سوهنا نبي” پياري پيغمبر حضرت محمد ﷺ جي محبت ۽ ياد ۾ هڪ عاجزانه نعت آهي. هن لکيو ته نبي ڪريم ﷺ جي زندگي ۽ پيغام اونداهين ۾ گھيريل دنيا تي روشني وجهي ٿو، اڄ به سندن مثال اسان کي ياد ڏياري ٿو ته ڪيئن انسانيت هڪٻئي لاءِ عزت، رحم ۽ شفقت سان رهي سگهي ٿي. ڳائڻي وڌيڪ لکيو ته هي سڀ کان خوبصورت تخليق لاءِ محبت ۽ عقيدت جو منهنجو ننڍڙو اظهار آهي.