| عمران مفاد پرست،جمهوريت ڊيڊ لاڪ نه ڳالهين سان وڌندي: وفاقي سرڪار |
اسلام آباد (بيورو رپورٽ) وفاقي سرڪار باني پي ٽي آءِ کي مفاد پرست قرار ڏيندي چيو آهي ته سياست ۽ جمهوريت ڊيڊ لاڪ سان نه ڳالهين ذريعي اڳتي وڌندي آهي. ان حوالي سان بچاءَ واري وزير خواجا آصف چيو آهي ته پي ٽي آءِ ليڊر جي سياسي ڊي اين اي ۾ ڳالهين جي ڪا گنجائش ناهي، عمران خان سڄي زندگي پنهنجي ذاتي مفاد تي فوڪس ڪيو آهي. هن چيو ته وزيراعظم مسلسل پي ٽي آءِ کي ڳالهين جي دعوت ڏئي رهيو آهي، الله ڪري هاڪاري ڳالهيون ٿين ۽ نتيجو نڪري. هن چيو ته ڳالهيون ڪجهه ڏيو ۽ ڪجهه وٺو جي بنياد تي ڪيون وينديون آهن پر عمران خان ڪو اصول پرست شخص ناهي، هو 200 سيڪڙو مفاد پرست شخص آهي، هو ذاتي فائدي لاءِ اصول ۽ انساني رشتا سڀني لتاڙي سگهي ٿو. ٻئي طرف وزيراعظم جي سياسي معاملن بابت صلاحڪار رانا ثناءٌ الله چيو آهي ته سياست ۽ جمهوريت ڊيڊ لاڪ سان نه پر ڳالهين ذريعي اڳتي وڌندي آهي ۽ سڀني سياسي ۽ جمهوري قوتن کي مسئلن جي حل لاءِ هڪ ٻئي سان گڏ ويهڻ گهرجي. مسلم ليگ (ن) هميشه چارٽر آف ڊيموڪريسي ۽ چارٽر آف اڪنامي لاءِ ڪوشش ڪئي آهي. وزيراعظم شهباز شريف به ڪابينا اجلاس ۾ واضح چيو ته حڪومت ڳالهين لاءِ تيار آهي، ۽ انهي کان اڳ پي ٽي آءِ کي چار ڀيرا ڳالهين جي دعوت ڏني وئي آهي۔ هن چيو ته پي ٽي آءِ جو باني چار سال اقتدار ۾ رهيو پر پنهنجي دور حڪومت ۾ ڪڏهن به اپوزيشن سان ڳالهيون نه ڪيون۔ باني پي ٽي آءِ جو موقف هو ته هو اين آر او نه ڏيندو ۽ هٿ ملائڻ يا گڏ ويهڻ لاءِ تيار نه آهي، ۽ اڄ به هو ڳالهين تي يقين نٿو رکي. رانا ثناءٌ الله چيو ته پي ٽي آءِ جي باني ڪڏهن سياست ناهي ڪئي. ۽ پنهنجي چئن ورهين جي حڪومتي دور ۾ سياسي رويو اختيار نه ڪيو، اُن جي پاليسي ۾ ڳالهين ۽ مسئلن جو حل شامل نه هو، پر هو فتنو، فساد ۽ اڻ ضابطي تي يقين رکندو آهي۔ هن چيو ته سلمان اڪرم راجا ۽ عليمه خان به ساڳيو موقف ورجايو جيڪو پي ٽي آءِ جي باني جي هدايت آهي، ۽ باني پي ٽي آءِ اڄ به پنهنجي پارٽي کي پيغام موڪلي رهيو آهي۔ ماضي ۾ 25 مئي 2022، 9 مئي ۽ 26 نومبر 2024 جا واقعا به انهي پاليسي جو تسلسل هئا۔ هن وڌيڪ چيو ته جيڪڏهن ملاقاتن کي ڪنٽرول نه ڪيو وڃي ها ته انهن جو هن سال به فتنو، فساد ۽ اڻ ضابطي پکيڙڻ جو ارادو هو، انهن جي منصوبا بندي ٽڪراءٌ، افراتفري ۽ امن امان جي صورتحال خراب ڪرڻ جي هئي۔ 8 فيبروري 2026 تي ڦيٿا جام هڙتال جي ڳالهه به انهي سلسلي جي هڪ ڪڙي آهي۔ انهن جي فتني ۽ فساد کي مضبوط هٿن سان روڪيو ويندو۔ وزير اعظم جي صلاحڪار رانا ثناءُ الله چيو ته نواز شريف هڪ سينئر سياستدان آهن جن جو ڊگهو سياسي سفر آهي، جنهن هميشه پنهنجو ڪردار ادا ڪيو آهي.