عمرڪوٽ گرلز هاسٽل هراسمينٽ اسڪينڊل: شهزور قائم خاني ۽ امبرين ذميوار قرار: ڪيس داخل: جاچ رپورٽ پڌري

جُولاءِ 9, 2023

عمرڪوٽ (رپورٽ:الياس ٿري) عمر ڪوٽ جي گرلز هاسٽل ۾ شاگردياڻين جي وڊيوز ۽ هراسمينٽ اسڪينڊل جي جاچ رپورٽ پڌري ٿي وئي، رپورٽ ۾ هاسٽل مالڪ شهزور قائم خاني ۽ امبرين قائم خاني کي ذميوار قرار  ڏنو ويو آهي

تفصيلي رپورٽ موجب عمرڪوٽ جي افغان محلي ۾ موجود ايجوڪيٽر گرلس ھاسٽل مامري بابت ڊي سي ۽ ايس ايس پي پاران جوڙيل ٻن ڌار ڌار ڪميٽين پاران ڇھين ڏينھن تي گڏيل پريس ڪانفرنس ۾ رپورٽ پڌري ڪئي وئي آھي

سٽي ٿاڻي عمرڪوٽ تي ڊي سي عمرڪوٽ نويد رحمان لاڙڪ ۽ ايس ايس پي عمرڪوٽ اعجاز احمد شيخ جاچ ڪاميٽين جي لاڳاپيل ميمبرن جي موجودگي ۾ پريس ڪانفرنس ڪندي چيو ته گرلس ھاسٽل معاملي کي وائرل ڪرڻ جي نتيجي ۾ نياڻين ۽ سندن تعليم تي خراب اثر پئجي رھيا ھئا

 ايس ايس پي عمرڪوٽ جو چوڻ ھو ته واقعي بابت پوليس پاران سرڪار جي فرياد تي ايف آءِ آر داخل ڪئي وئي آھي، واقعي جا ھاسٽل مالڪ شھروز قائمخاني ۽ سندس اڳوڻي ڪاروباري حصيدار عورت امبرين قائمخاني ذميوار ھئا، جن تي ڪيس داخل ڪيو ويو آھي

 ھڪ سوال جي جواب ۾ ايس ايس پي چيو ته ھن مھل تائين جاچ ۾ شھروز قائمخاني ۽ امبرين قائمخاني ذميوار نڪتا آھن، مٿن ڪيس به داخل ٿي ويو آھي، اڳتي ڪيس جي جاچ دوران جيڪڏھن ڪي ٻيا نالا سامھون آيا ته اھي به شامل ڪيا ويندا

 ان موقعي تي ڊي سي عمرڪوٽ پريس ڪانفرنس دوران ڳالھائيندي چيو ته الزام ھيٺ آيل ايجوڪيٽر گرلس ھاسٽل ۾ مردن جي اچ وڃ جون شاھديون مليون آھن، ايئن نه ٿيڻ کپندو ھو

هي به پڙهندا

 ڊي سي ۽ ايس ايس پي رپورٽ پڌري ڪندي چيو ته ٻن ڄڻن جي ذاتي جھيڙي ۽ تڪرار ۾ نياڻين جي تعليم تي ناڪاري اثر پئجي رھيا ھئا، عمرڪوٽ ۾ موجود سمورا گرلس ۽ بوائز ھاسٽل 15 ڏينھن اندر پوليس وٽ رجسٽريشن ڪرائيندا، ٻي صورت ۾ انتظاميا غير رجسٽرڊ ھاسٽل کي بند ڪرائيندي

سندن چوڻ هو ته  ڪارروائي ڪندي شھروز قائمخاني ۽ امبرين تي مستقبل ۾ اھا پابندي لڳائي ويندي ته اھي ٻئي اسٽوڊنٽس ھاسٽل کولڻ جو ڪاروبار نه ڪندا

 سٽي ٿاڻي عمرڪوٽ تي پريس ڪانفرنس دوران ٻنھي جاچ ڪميٽين جا آفيسر اي سي عمرڪوٽ حنين طارق شاھاڻي ڊي ايس پي فضل حق چانڊيو سي آء اي انچارج سيد الطاف شاھ ۽ ٻيا موجود ھئا

رپورٽ ۾ شھروز ۽ امبرين قائمخاني وچ ۾  لاڳاپن جي نشاندهي

سرڪار جي فرياد تي داخل ڪيل ايف آءِ آر ۾ ڄاڻايو ويو آھي ته شھروز قائمخاني ۽ امبرين قائمخاني جا ھڪٻئي سان ڪافي وقت کان لاڳاپا رھيا آھن،  اهي ڪاروباري ۽ ڪن اندروني ڳالھين جي ڪري پاڻ ۾ ناراض ٿيا،  ھڪٻئي خلاف ھاسٽل جو نالو استعمال ڪري من گھڙت ڪھاڻيون گھڙي الزام ھنيا

ناميارا شاعرن حاجي ساند ۽ سائينداد مڱريو ڪيس جا شاھد ڄاڻايا ويا

هاسٽل مالڪ شھروز ۽ امبرين قائمخاني خلاف داخل ڪيل ايف آءِ آر ۾ پوليس ناميارن شاعرن حاجي ساند، سائينداد مڱريو ۽ سماجي اڳواڻ بنسي مالھي کي ڪيس جو شاھد ڄاڻائيندي لکيو آھي ته نامزد جوابدار شھروز قائمخاني ۽ امبرين قائمخاني بابت ڄاڻايل ٽنھي ڄڻن تصديق ڪئي ته نامزد جوابدار شھروز قائمخاني ۽ امبرين قائمخاني جو ھاسٽل ھلائڻ جو گڏيل ڪاروبار آھي

جاچ رپورٽ جون ڪاپيون صحافين کي نه ڏنيون ويون

ضلعي عملدارن پريس ڪانفرنس دوران ٻنھي جاچ ڪميٽين پاران جاري ڪيل رپورٽن جون ڪاپيون صحافين کي نه ڏنيون ويون، البت سادي پريس بريفنگ ۽ ايف آءِ آر جي ڪاپي صحافين حوالي ڪري عملدار روانو ٿي ويا

نامزد جوابدار امبرين قائمخاني جي گرفتاري عمل ۾ نه اچي سگهي

گرلس ھاسٽل واقعي بابت شڪايتون ڪندڙ ۽ شھروز قائمخانيءَ جي اڳوڻي ڪاروباري حصيدرا رھندڙ عورت امبرين قائمخاني پاران اڳواٽ پنھنجي وڊيو بيانن وسيلي اھو چيو ويو ھو ته کيس جاچ دوران ھڪ پوليس آفيسر حراسان ڪري رھيو آھي ته ٻئي ڪنھن جو نالو نه کڻان، جڏھن ته ھن وومين پوليس ٿاڻي جي ايس ايڇ او خلاف به عدم سھڪار جو الزام ھنيو ھو پر پڌري ٿيل رپورٽ ۾ امبرين جي سمورن بيانن کي ڪوڙو قرار ڏئي کيس ڪيس ۾ جوابدار نامزد ڪيو ويو آھي. ذريعن موجب پوليس ھاءِ پروفائيل رپورٽ پڌري ڪرڻ مھل امبرين کي گرفتار ڪرڻ لاءِ پوليس سندس گھر به وئي ھئي پر هوءَ ھٿ اچي نه سگھي. ذريعن موجب پوليس سندس الڳ سان ھلندڙ ھاسٽل بند ڪرائي ڇڏيو آھي

Leave A Comment