غيرقانوني گرفتارين تي ڳڻتي، اها آئين جي ڀڃڪڙي آهي، ذميوارن جو احتساب ڪيو وڃي: ايچ آر سي پي

لاهور (م ڊ) پاڪستان جي انساني حقن جي ڪميشن (ايچ آر سي پي) غير قانوني گرفتارين، نظربندين ۽ جبري گمشدگين تي سخت ڳڻتي جو اظهار ڪندي چيو آهي ته هن رجحان کي پاڪستان کي فوري طور تي روڪڻ گهرجي. ايڪس تي بيان ۾ چيو ويو ته ڪي پي حڪومت جي جرڳي بعد پشاور يونيورسٽي جي شاگردن حبيب وزير ۽ عدنان وزير جي مبينا گمشدگي هڪ مثال آهي ته قانوني گهرجن کي ڪيئن معمول مطابق نظرانداز ڪيو ويندو آهي. ايچ آر سي پي موجب اڳوڻي قومي اسيمبلي ميمبر نثار پنهور ۽ سندس پٽ محسن پنهور جي مبينا گمشدگي پڻ وڏي ڳڻتي جوڳي آهي. اهي واقعا بلوچستان ۾ عورتن ۽ نابالغن جي حراست سان ڳنڍيل آهن، جن ۾ گهٽ ۾ گهٽ ڇهه ٻيا ماڻهو شامل آهن، جن ۾ معذور شاگردياڻي ۽ ڪارڪن ماه جبين بلوچ به شامل آهي. اهڙا قدم آئيني ضمانتن جي ڀڃڪڙي ڪن ٿا ۽ خاندانن ۽ برادرين کي ناقابل تلافي نقصان پهچائين ٿا. بيان ۾ چيو ويو آهي ته اسان ٻيهر ورجايون ٿا ته رياست کي شفافيت کي يقيني بڻائڻ گهرجي، ذميوارن کي جوابده قرار ڏيڻ گهرجي ۽ متاثر خاندانن کي انصاف تائين غير مشروط رسائي فراهم ڪرڻ گهرجي.