| لاڙڪاڻو پوليس جا اهلڪار نوجوان جا قاتل قرار: جاچ مڪمل، رپورٽ آءِ جي حوالي |
لاڙڪاڻو (بيورو رپورٽ) لاڙڪاڻي ۾ پوليس اهلڪار هٿان سرعام گوليون هڻي مبينا ڏوهاري کي مارڻ بابت رپورٽ آءِ جي سنڌ حوالي ڪئي وئي آهي. واقعي بابت اعليٰ سطحي جاچ ڪميٽي پنهنجي رپورٽ آءِ جي سنڌ حوالي ڪري ڇڏي، ذريعن موجب اعليٰ سطحي جاچ ڪميٽي مقابلي کي اصل قرار ڏيندي علي ڪلهوڙو جي موت جو ذميوار پوليس اهلڪار عرض محمد جتوئي کي قرار ڏنو ويو آهي، ان کان ساوءِ وارثن جي 164 بيانن جي روشني ۾ اهلڪارن کي ايف آءِ آر ۾ شامل ڪرڻ جي سفارش ڪئي وئي آهي، اهڙي معاملي بعد علي گل ڪلهوڙو وارو معاملو عدالت پهچي ويو، وارثن طرفان ايس ايڇ او حيدري ۽ ٻين اهلڪارن مٿان ايف آءِ آر داخل ڪرائڻ لاءِ عدالت ۾ درخواست داخل ڪئي وئي آهي، جنهن تي عدالت ڌرين کي 15 جنوري تي طلب ڪري ورتو آهي. ان ڏس ۾ ذريعن موجب آءِ جي سنڌ پاران جوڙيل اعليٰ سطحي جاچ ڪميٽي جاچ رپورٽ ڄاڻايو آهي ته پوليس مقابلو حقيقت تي مبني هو. جاچ ڪميٽي مارجي ويل علي گل ڪلھوڙي کي پوليس اهلڪار عرض محمد جتوئي گوليون هڻي قتل ڪرڻ جو ذميوار قرار ڏئي ڇڏيو آهي ۽ چيو آهي ته علي گل ڪلھوڙو مٿان 11 ڪيس داخل ٿيل هئا جاچ ۾ اهو به ڄاڻايو ويو آهي ته وارثن جا 164 جي بيانن بعد اهلڪارن کي مقابلي واري ايف آءِ آر ۾ شامل ڪري سگهجي ٿو. ٻئي طرف مبينا مقابلي ۾ مارجي ويل علي گل ڪلهوڙو جي وارث سئوٽ غوث بخش ڪلهوڙو پنهنجي وڪيل اطهر عباس سولنگي معرفت ڊسٽرڪٽ اينڊ سيشن جج لاڙڪاڻو جي عدالت ۾ واقعي جي ايف آءِ آر داخل ڪرائڻ لاءِ 22 اي جي درخواست داخل ڪرائي آهي جنهن ۾ هن ايس ايس پي لاڙڪاڻو، ايس ايڇ او حيدري کي ڌر بڻائيندي علي گل ڪلهوڙو جي قتل جي ايف آءِ آر ايس ايڇ او حيدري عبدالرزاق گائينچو، هيڊڪانسٽيبل نثار سيال، ڪانسٽيبل عزيز احمد جتوئي، ڪانسٽيبل عرض محمد جتوئي سميت حيدري ٿاڻي تي مقرر سڄي عملي مٿان داخل ڪرائڻ جي استدعا ڪئي آهي. درخواست جي متن ۾ درخواست گذار ڄاڻايو ويو آهي ته علي گل ڪلهوڙو پيپلز پارٽي جو سرگرم ڪارڪن هو، 27 ڊسمبر تي اسان ٻن موٽرسائيڪلن تي شهيد محترمه بينظير ڀٽو جي ڳڙهي خدابخش ڀٽو ۾ رٿيل ورسي تقريب ۾ شرڪت ڪرڻ لاءِ وياسين، واپسي تي ايس ايڇ او حيدري عبدالرزاق گائينچو، هيڊڪانسٽيبل نثار سيال، ڪانسٽيبل عزيز احمد جتوئي، ڪانسٽيبل عرض محمد جتوئي زيب جتوئي ۽ ٻين روڪي تلاشي ورتي، ايس ايڇ او ۽ ٻين اهلڪارن علي گل کان هڪ لک روپيا کسي کيس گوليون هڻي قتل ڪري ڇڏيو، علي گل ڪلهوڙو کي قتل ڪرڻ واري ويڊيو پڻ رڪارڊ تي موجود آهي. . حيدري ٿاڻي جي حد ۾ 20 ڏينهن اڳ مبينا مقابلي ۾ قمبر تعلقي جي ڳوٺ مهي مڪول واسي علي گل ڪلهوڙو کي مبينا پوليس مقابلي ۾ مارڻ جي دعويٰ ڪئي هئي جنهن کان پوءِ مارجي ويل علي گل ڪلهوڙو جي ويڊيو سوشل ميڊيا تي وائرل ٿي هئي جنهن ۾ پوليس اهلڪار عرض محمد جتوئي کي نوجان کي سرعام گوليون هڻندي ڏسي سگھجي ٿو.