لاڙڪاڻي ۾ سلينڊر ڌماڪو ڪيئن ٿيو؟ واقعي جي جاچ جي لاءِ انڪوائري ڪاميٽي قائم

لاڙڪاڻو (رپورٽ: نويد لاڙڪ) لاڙڪاڻي ۾ 4 ڏينهن اڳ لهر ڪالوني ۾ پيش آيل ڌماڪي واري واقعي جي جاچ جو حڪم، ڪاميٽي قائم، آءِ جي سنڌ طرفان 16 ڊسمبر تي پيش آيل ڌماڪي واري واقعي جي جاچ لاءِ ليٽر جاري ڪري ايڊيشنل آءِ جي اسپيشل برانچ ذوالفقار لاڙڪ جي سربراهي ۾ ڪاميٽي قائم ڪئي وئي آهي،   ڪاميٽي ۾ ڊي آءِ جي اسپيشل برانچ شيراز نظير عباسي، ايس ايس پي انٽيليجنس عادل ميمڻ، ڊي آءِ جي لاڙڪاڻو ناصر آفتاب  ميمبر هوندا،  ليٽر ۾ ڄاڻايو ويو آهي ته ڪاميٽي 16 ڊسمبر تي منجهند اڍائي وڳي ڌاري لهر ڪالوني ۾ پيش آيل ڌماڪي واري واقعي جي نوعيت، ڪارڻ ۽ حالتن جو تعين ڪندي، جنهن ۾ ڪيترائي گهر متاثر ٿيا ۽ 4 قيمتي جانيون ضايع ٿيون، ڪاميٽي کي فوري طور حادثي واري هنڌ وڃي سمورن موجود شاهدين ۽ رپوٽس جي جاچ ڪري 3 ڏينهن اندر واضح نتيجي واري رپورٽ ۽ سفارشون پيش ڪرڻ جي هدايت ڪئي وئي آهي، متن ۾ لکيو ويو آهي ته ڪاميٽي تعين ڪري ته آيا واقعو حادثاتي هو يا ٻي صورت ۾ جيڪڏهن ڪا غفلت، خلاف ورزي يا حفاظتي ڪوتاهي آهي ته ان جي به نشاندهي ڪري. واضح رهي ته واقعي ۾ 2 ٻار ۽ 2 عورتون فوت ٿيون ۽ ڪيترائي زخمي ٿيا هئا، جڏهن ته ٽائيم نيوز طرفان ڊرون رڪارڊنگ ذريعي ڪوريج ڪرڻ کانپوءِ ماڻهن طرفان واقعي تي سوال اٿاريا ويا ۽ بااختيار ڌريون حرڪت ۾ آيون.