مورو: اين پي پي جي سربراهه غلام مرتضيٰ جتوئي جي گھر واري نوين جتوئي چيو آھي ته پاڻ کي هوم منسٽر سڏائيندڙ ضِياءِ لنجار جي تازي ميڊيا بيان جي مذمت ڪريان ٿي. هن اسان جي خاندان جي ساک کي خراب ڪرڻ جي جيڪا ڪوشش ڪئي آهي، اها نه صرف بي بنياد آهي پر انتهائي افسوسناڪ به آهي. ھن چيو ته منهنجي مڙس غلام مرتضيٰ جتوئي رڳو ايترو چيو هو ته پمپن ۽ دڪانن جي ڀڃ ڊاهه ۾ جيڪو به ملوث هوندو، ان کي جوابده بڻايو ويندو. هن ڪنهن به شخص جو نالو نه ورتو هو. اهو انتهائي حيرت انگيز آهي ته لنجار پاڻ ئي هن ڳالهه کي پنهنجي طرف وٺي ويو. جيڪڏهن ڪنهن جو نالو ئي نه ورتو ويو هو ته پوءِ هن کي ڇو لڳو ته ڳالهه ان بابت ٿي رهي آهي؟ انهي مان صاف ظاهر ٿئي ٿو ته شايد هو پاڻ کي ان عمل جو ذميوار سمجهي ٿو. ھن چيو آھي ته اسان جي “خانداني” هجڻ بابت ڳالهائڻ وارن کي ٻڌائڻ چاهيون ٿا ته اسان کي ڪنهن کان به اهڙي سرٽيفڪيٽ جي ضرورت ناهي. اسان کي خبر آهي ته اسان ڪير آهيون. اسان کي ايف آءِ آرن جون ڌمڪيون ڏيڻ بدران حقيقتن کي منهن ڏنو وڃي. اڳ ئي اسان خلاف ڪيترائي ڪوڙا ڪيس داخل ڪيا ويا آهن، پر اسان نه ڊنا آهيون ۽ نه ڊڄنداسين، ڇاڪاڻ ته اسان سچ تي بيٺل آهيون. اسان واضح طور چئون ٿا ته اهڙيون ڌمڪيون ۽ ڪوڙيون مهمون اسان کي خاموش نٿيون ڪري سگهن. اسان پنهنجو آواز ۽ حق لاءِ جدوجهد جاري رکنداسين.
