ماسترن جون ڊگريون چڪاسيون؟ سنڌ جي 5 ڊائريڪٽرن کي شوڪاز

ڪراچي (اسٽاف رپورٽر) تعليم کاتي پاران پي ايس ٽيز ۽ جي اي ايس ٽيز طور ڀرتي ٿيل استادن جون ڊگريون تصديق ڪرائڻ بابت رپورٽ جمع نه ڪرائيندڙ ڊائريڪٽرن کي شوڪاز نوٽيس جاري، ان ڏس ۾ تازو پي ايس ٽيز ۽ جي اِي ايس ٽيز طور ڀرتي ٿيندڙ استادن جون ڊگريون  چڪاسڻ بعد رپورٽ سيڪريٽري حوالي نه ڪندڙ 5 ڊائريڪٽرن کي سيڪريٽري تعليم پاران شوڪاز نوٽيس جاري ڪيو ويو آهي. ان ڏس ۾ ڪراچي جي ڊائريڪٽر مرزا ارشد بيگ، لاڙڪاڻي جي ڊائريڪٽر صفدر شاھ، حيدرآباد جي ڊائريڪٽر ممتاز علي، بينظير آباد جي ڊائريڪٽر رياض اڄڻ ۽ سکر جي ڊائريڪٽر حافظ شهاب الدين انڍڙ کي شوڪاز نوٽيس جاري ڪيا ويا آهن. جاري ڪيل شوڪاز ۾ هدايت ڪئي وئي آهي ته نئين ڀرتي ٿيل پي ايس ٽيز ۽ جي اي ايس ٽيز جي ڊگرين بابت رپورٽ ٽن ڏينهن اندر جمع ڪرائي وڃي، ٻي صورت ۾ سندن خلاف ڪاروائي ڪئي ويندي