ڪراچي(رپورٽ: حبيب جمالي) ڪراچي ۾ قتل ٿيل ماٿيلي واسي انجنيئر عمران نائچ جي قتل ۾ زال ملوث نڪتي، پوليس اسلام آباد جي انٽرنيشنل اسلامڪ يونيورسٽي جي شاگرد کي گرفتار ڪري ورتو
تفصيل موجب گلشن حديد ۾ 3 مهينا اڳ ماٿيلي واسي ڪي اليڪٽرڪ انجنيئر عمران نائچ جي قتل وارو معاملو ايس ايس پي سي ٽي ڊي بشير بروهي حل ڪري ورتو
پوليس مقتول جي قتل ۾ اسلام آباد جي انٽرنيشنل اسلامڪ يونيورسٽي جي شاگرد فيصل سيال کي گرفتار ڪري ورتو آهي جنهن ڏوهه جو اعتراف ڪندي مقتول جي زال کي به ملوث ڄاڻائي ڇڏيو آهي
ايس ايس پي بشير بروهي موجب سي ٽي ڊي جي ٽيم ڪراچي ۾ ڪارروائي ڪري جوابدار فيصل سيال کي گرفتار ڪيو، جوابدار ڏوهه جو اعتراف ڪندي چيو آهي ته سندس مقتول جي زال ثنا سان لاڳاپا هئا
بشير بروهي جو چوڻ آهي ته جوابدار فيصل ۽ ثنا پاڻ ۾ شادي ڪرڻ پئي چاهي، جوابدار اسلام آباد مان پنهنجي ڳوٺ ميرپور ماٿيلو آيو ۽ اتان ڪراچي پهتو، عمران نائچ جي زال ڳوٺ ۾ جوابدار کي گهر جي چاٻي ڏني
ايس ايس پي موجب جوابدار ڪراچي اچي گهر جي ڇت تي سمهي رهيو، عمران ڊيوٽي تان واپس گهر پهتو ته جوابدار ڇت تان لهي اچي سندس ڳلو ڪٺي ڇڏيو
بشير بروهي ٻڌايو ته عمران نائچ جي زال گهر جي ائڊريس ۽ گهر ۽ گهٽين جي وڊيو ٺاهي جوابدار کي موڪليون ته جيئن جوابدار آساني سان پهچي عمران نائچ کي قتل ڪري سگهي
ايس ايس پي بشير بروهي موجب جوابدار ٻڌايو ته مون سان شادي نه ٿيڻ ڪري ثنا خودڪشي جي ڪوشش به ڪئي، عمران نائچ کي قتل ڪرڻ جو مقصد کيس رستي تان هٽائڻ هو
