مردن جو وارڊ ڏيون يا عورتن وارو؟ کدڙي فقير سان اسپتال انتظاميا جي طنز

سکر(رپورٽ: فاروق سومرو) سکر ۾ پوليس ۽ اسپتال انتظاميا انسانيت جا ليڪا لتاڙي ڇڏيا، تشدد جي شڪار کدڙي فقير کي اسپتال انتظاميا عورتن يا مردن وارو وارڊ ڏيڻ لاءِ طنز ۽ پوليس ميڊيڪل لاءِ ليٽر ڏيڻ بابت تنگ ڪندي رهي

تيرچوڪ واسي کدڙي فقير علي جان عرف ثنا دانھيندي الزام مڙھيو آھي ته نوجوان اسامه راجپوت پنھنجي ٻن ساٿين سان گڏجي گھر ۾ داخل ٿي سخت تشدد جو نشانو بڻايو ، جنھن سبب سندس ھڪ اک شديد متاثر ٿي آھي

سندس چوڻ هو ته جسم تي تشدد جو نشانو بڻائڻ بعد ٽيئي ڄڻا کيس مرڻينگ حالت ۾ ڇڏي فرار ٿي ويا، منھنجي رڙين تي مقامي ماڻھو وڏي انگ ۾ گڏ ٿيا پر ڪو به بچائڻ لاءِ ويجهو نه آيو جنهن بعد مون سھيليءَ ڏانھن ڪال ڪئي جيڪا ٿاڻي تي کڻي ھلي

کدڙي فقير الزام هنيو ته پوليس فوري طور تي ميڊيڪل ڏيڻ بدران کيس تنگ ڪندي عجيب سوال ڪندي رھي، ميڊيڪل لاءِ ليٽر ملڻ بعد اسپتال ۾ موجود عملو به طرح طرح سان تنگ ڪرڻ لڳو، توھان کي مردن واري وارڊ ۾ موڪلجي يا عورتن واري وارڊ ۾ ڇاڪاڻ ته کدڙن فقيرن لاءِ ڪوبه وارڊ ناھي

علي جان عرف ثنا جو چوڻ هو ته سندس جسم مان رت رهيو هو  پر پوليس توڙي اسپتال جي عملي کي ترس نه پئي آيو. نيٺ فرسٽ ايڊ ڏيڻ کان پوءِ واپس اماڻيو ويو

هن چيو ته پوليس وٽ پھچي تشدد ڪندڙ اسامه ۽ سندس ساٿين خلاف شڪايت ڪئي، پوليس اسامه کي حراست ۾ ورتو، پر سندس 2 ساٿي ھن وقت تائين گرفتار ناھن ٿي سگھيا

کدڙي فقير الزام مڙھيو ته حراست ۾ ورتل اسامه کي به پوليس رات جي وقت گھر ڇڏي وڃي ٿي ۽ وري صبح جو ٿاڻي تي کيس گھرايو وڃي ٿو. ڇا اسان کدڙن فقيرن لاءِ قانون الڳ ۽ عام ماڻھن لاءِ الڳ آھي. اسان کي ڇو پيو نظر انداز ڪيو وڃي، هن مطالبو ڪيو ته ڊي آءِ جي ۽ ايس ايس پي سکر نوٽيس وٺي تحفظ ۽ انصاف فراھم ڪن

 ٻئي طرف کدڙي فقير ثنا جي سھيلي بوبي ٻڌايو ته ڪال تي جڏهن  آئون ثنا جي گهر پهتيس ته هو  ڪمري ۾ ڪپڙن کان آجي مرڻينگ حالت ۾ ھئي ۽ سندس ڪپڙا رت ۾ لت پت ھئا، اھڙي صورتحال ۾ مقامي ماڻھن ته مدد نه ڪئي پر پوليس توڙي اسپتال جي عملي به اسان سان تڪليف ڏيندڙ رويو اختيار ڪيو

سندس چوڻ هو ته ھن وقت به اسان کي ٺاهه ڪرڻ لاءِ ڌمڪيون ڏنيون پيون وڃن، اسان جي جان کي خطرو آھي، پوليس جا اعليٰ عملدار تحفظ ۽ انصاف فراھم ڪن

ٻئي طرف رابطو ڪرڻ تي اي سيڪشن پوليس جو چوڻ آهي ته فريادي جي الزام هيٺ آيل نوجوان پاڻ ۾ سٺا دوست آهن جن جي تازو ئي سوشل ميڊيا تي شادي بعد ۾ ترديد واري وڊيو وائرل ٿي هئي، ڪنهن ڳالهه تان ٻنهي ۾ جهيڙو ٿي پيو

پوليس موجب زخمي کدڙي فقير جي شڪايت تي نوجوان کي گرفتار ڪيو ويو آهي ۽ هاڻي ٻنهي ڌرين ۾ ٺاهه ٿي ويو آهي