معذور چيني عورت محتاجي باوجود ڀرپور زندگي گذاري مثال بڻيل

بيجنگ (انٽريسٽنگ نيوز) چين ۾ هڪ 81 سالن جي عورت کي سڀ کان مضبوط ماءُ قرار ڏنو ويو آهي. هن بغير هٿن ۽ پيرن جي پيدا ٿي 3 ٻار پاليا. بزرگ عورت جي ڪهاڻي تازو ئي سامهون آئي ۽ انٽرنيٽ استعمال ڪندڙن کي متاثر ڪري وئي. 81 سالن جي وانگ يوشي چين جي گانسو صوبي جي بائيين جي رهواسي آهي ۽ هٿن ۽ پيرن کان سواءِ پيدا ٿي هئي. حقيقت ۾، ٽيهن سالن تائين هن جو ڪو نالو به نه هو. سندس 38 سالن جي پٽ زينگ لائي هو چيو ته منهنجي ماءُ هٿن ۽ پيرن کان سواءِ پيدا ٿي هئي ۽ 20 سالن جي عمر تائين ان جو ڪو به نالو نه هو. جڏهن هن 27 سالن جي عمر ۾ منهنجي پيءُ سان شادي ڪئي ته ان جو نالو وانگ يوشي رکيو ويو. وانگ يوشي 3 ٻارن کي جنم ڏنو، جن ۾ هڪ ڌيءَ ۽ 2 پٽ شامل آهن. زراعت هن علائقي ۾ آمدني جو مکيه ذريعو آهي، تنهن ڪري هن جو مڙس اڪثر گهر کان پري رهندو هو، تنهن ڪري وانگ يوشي ٻارن جي سنڀال ڪندي هئي ۽ گهر جو ڪم پاڻ ڪندي هئي. پنهنجي معذوري جي باوجود هن پنهنجا سڀ فرض پورا ڪيا. سندس پٽ چيو ته اسان جي ماءُ ڪپڙن ڌوئڻ، کاڌو پچائڻ ۽ ٻيا ڪم چڱيءَ طرح ڪندي هئي. هوءَ کاڌو پچائڻ لاءِ پنهنجي جسم کي اسٽول تي هلائيندي هئي ۽ پوءِ اٽو ڳهندي هئي ۽ ڀاڄيون پنهنجي وات سان ڪٽيندي هئي. هوءَ پنهنجي وات سان ڪپڙا به سبندي هئي ۽ کائڻ لاءِ پنهنجي ٺونٺين جي وچ ۾ چوپ اسٽڪ دٻائيندي هئي. وانگ يوشي ميڊيا کي ٻڌايو ته ان وقت مان اڪيلي هيس ٻار سنڀاليندي هيس زندگي تمام ڏکي هئي، پر مون ڪڏهن به شڪايت نه ڪئي ۽ ڪڏهن به ٻارن کي بکيو سمهڻ نه ڏنو. هاڻي سندس ٽن ٻارن جا پنهنجا خاندان آهن، جڏهن ته سندس مڙس فوت ٿي چڪو آهي. وانگ يوشي هاڻي پنهنجي ننڍي پٽ جي خاندان سان گڏ رهي ٿي. هوءَ هاءِ بلڊ پريشر ۾ مبتلا آهي پر عام طور تي سٺي صحت اٿس.