ملڪ ۾ ٻارن جي پيدائش گهٽجي وئي، انٽرنيٽ جي استعمال ۾ واڌ: پهريون ڊجيٽل اقتصادي سروي جاري

اسلام آباد(بيورو رپورٽ) شماريات کاتي پاران پهريون ڊجيٽل هائوس هولڊ انٽيگريٽيڊ اقتصادي سروي 25/2024 جاري ڪري ڇڏيو. سروي مطابق ملڪ ۾ ٻارن جي پئداش واري شرح 3.7 مان گهٽجي 3.6 ٿي وئي. تازي ڄاول ۽ کير پياڪ ٻارڙن جي موت جي شرح ۽ اسڪولن کان ٻاهر ٻارن جي انگ ۾ لاٿ ۽ اسڪولن کان خواندگيءَ جي شرح ۾ اضافو رڪارڊ ڪيو ويو آهي. انٽرنيٽ تائين رسائي 34 سيڪڙو مان وڌي 70 سيڪڙو، انٽرنيٽ استعمال ڪندڙ جي شرح 17 مان وڌي 57 سيڪڙو ۽ گهرن ۾ موبائيل فون يا سمارٽ فون جي سهولت 96 سيڪڙو تائين ٿي وئي آهي. تفصيل مطابق شماريات کاتي پاران جاري ڪيل سروي رپورٽ ۾ ڄاڻاي وويو آهي ته  قومي سطح تي خواندگي جي شرح 60 سيڪڙو مان وڌي 63 سيڪڙو ٿي وئي. اسڪول کان ٻاهر ٻارن جي شرح 30 سيڪڙو مان گهٽجي 28 سيڪڙو رهجي وئي، گهريلو سطح تي انٽرنيٽ تائين رسائي 34 سيڪڙو مان وڌي 70 سيڪڙو تائين پهچي وئي آهي. انٽرنيٽ استعمال ڪندڙ ماڻهن جو تناسب 17 سيڪڙو مان وڌي 57 سيڪڙو ٿي ويو آهي. جڏهن ته گهرن ۾ موبائيل يا اسمارٽ فون جي سهولت 96 سيڪڙو تائين پهچي وئي. پڌرائي مطابق مڪمل حفاظتي ٽُڪن جي ڪوريج 68 سيڪڙو مان وڌي 73 سيڪڙو ٿي وئي، صاف ٻارڻ جي استعمال جي شرح 35 سيڪڙو مان وڌي 38 سيڪڙو ٿي وئي. ابتدائي تعليم ۾ صنفي برابري 92 سيڪڙو مان وڌي 96 سيڪڙو تائين پهچي وئي. پڌرائي مطابق تازي ڄاول ٻارن جي موت واري شرح 41 مان گهٽجي 35 في هزار ٿي وئي. کير پياڪ ٻارن جي موت جي شرح 60 مان گهٽجي 47 في هزار ٿي وئي. مجموعي پيدائش جي شرح ۾ گهٽتائي رڪارڊ ٿي آهي. مجموعي طور پئداش واري شرح 3.7 مان گهٽجي 3.6 ٻارن تي اچي وئي. سروي مطابق قومي سطح تي گهريلو خرچن جو سڀ کان وڏو حصو خوراڪ تي خرچ ٿي رهيو آهي.