| مهر-جتوئي تڪرار ختم ڪرائينداسين، روڊ تي ماڻهو مارڻ جھيڙي جو اصول ناهي: علي گوهر مهر |
رستم (رپورٽ: طيب جتوئي) رستم واسين جي ڄڃ تي حملي ۾ قتل ڪيل گھوٽ الطاف احمد مھر، سندس معصوم ڀاءُ محمد حسن مھر ۽ ڪار ڊرائيور محمد رمضان مھر جي وارثن وٽ ايم اين اي علي گوھر مھر ۽ اڳوڻو ايم اين اي غوث بخش مهر پهتا، جتي ٽنھي مقتولن جي وارثن سان تعزيت ڪري ڏک جو اظھار ڪيو ويو، ان موقعي تي ايم اين اي علي گوھر مھر تڪرارن کي بار بار “ قومي ” تڪرار چوندو رهيو، علي گوهر مهر چيو ته قومي جھيڙن ۾ اھو اصول ناھي ته روڊ تي بيھي ماڻھو مارجن، جنھن ۾ ڄڃ به ٽارگيٽ تي اچي وڃي، گھوٽ، سندس معصوم ڀاءُ سميت ٽن ڄڻن کي قتل ڪندڙ جوابدار کي گرفتار ڪرايو ويندو، ھن وڌيڪ چيو ته جتوئي-مھر تڪرار ۾ نئون اصول آڻي صلح ڪنداسين، اصول اھو ھوندو ته ذات بدران وري به ايم اين اي علي گوھر مھر “قوم” جو لفظ استعمال ڪندي چيو ته جتوئي ۽ مھر ڌرين ۾ جيڪي به جھيڙا ھلن ٿا ته ڌرين جا ماڻھو آمھون سامھون، وڙھن، رستي ويندڙ بيگناھن کي قتل نه ڪيو وڃي، جڏھن ته قبيلائي ويڙھ ۾ ڏوھارين کي الڳ ڪري گورنمينٽ کي گذارش ڪبي ته کين گرفتار ڪيو، جڏھن ته ڏوھارين کان الڳ علي گوهر مهر وري به “ قوم ” جو لفظ استعمال ڪندي چيو ته جتوئي مھر قومن ۾ جيڪو جھيڙو ھلي ٿو، جتوئين جي چڱن مڙسن سان رابطو ڪري مستقل طور حل ڪڍي جلد تاريخ مقرر ڪري صلح ڪرايو ويندو، جڏھن ته ڏوھارين کي الڳ ڪري حڪومت کي گذارش ڪبي ته کين گرفتار ڪيو وڃي، ٻئي طرف ايم اين اي علي گوھر مھر پاران ذات کي قوم سڏڻ بعد سوشل ميڊيا تي نئون بحث شروع ٿي ويو آهي.
| ڄڃ تي حملو: گهوٽ سميت 3 ڄڻن جا قاتل پڪڙ ۾ نه آيا |
رستم: رستم واسي گھوٽ الطاف مھر کي رستم کان جيڪب آباد وڃڻ وقت شڪارپور ۾ ڄڃ تي حملو ڪري معصوم ڀاءُ ۽ ڊرائيور سميت قتل ڪيو ويو ھو، جتوئي ھائوس جي ترجمان علي حسن جتوئي سميت 30 کان وڌيڪ جوابدارن خلاف ٽيڻي قتل جو ڪيس داخل ھجڻ باوجود شڪارپور پوليس ھڪ به جوابدار کي گرفتار نه ڪري سگهي آهي، جڏھن ته شڪارپور شھر جي رستم موڙ وٽ جتوئي- مھر تڪرار جي آڙ ۾ ھٿياربند ڏينھن ڏٺي جو ڪئمپ قائم ڪري ماڻهن کي تلاشي وٺڻ بھاني تذليل جو نشانو بڻائين ٿا، پوليس ڪابه ڪارروائي نه ڪئي.
علي گوهر مهر جي آمد جي خوشي ۾ هوائي فائرنگ: وڊيو وائرل ٿي وئي
رستم: رستم ۾ پ پ پ ايم اين اي علي گوھر مھر ۽ اڳوڻي ايم اين اي غوث بخش مھر جي آمد وقت هٿياربند استقبال طور خوشي ۾ فائرنگ ڪندا رهيا، اهڙي وڊيو پنهنجي اخبار کي هٿ اچي وئي، وڊيو ۾ ڏسي سگهجي ٿو ته هٿياربند ايم اين اي جي آمد وقت هوائي فائرنگ ڪري رهيا آهن، جڏهن ته جو چند قدمن تي پوليس اسٽيشن ھجڻ باوجود پوليس فائرنگ بند نه ڪرائي سگھي.