مورو ۾ خوفناڪ حادثو: مختيارڪار ڪشمور جي 4 ڌيئرن سميت 8 ڀاتي فوت: عيد جون خوشيون ماتم ۾ تبديل

مورو(ن پ و)موري ۾ خوفناڪ حادثي سبب مختياڪار ڪشمور جي 4 ڌيئرن سميت 8 ڀاتي فوت ٿي ويا، عيد جون خوشيون ماتم ۾ تبديل ٿي ويون

قومي شاهراهه تي تيز رفتار ڪوچ ۽ ڪار وچ ۾ ٽڪر ٿي پيو جنهن جي نتيجي ۾ ڪشمور جي مختيارڪار اعجاز ٻرڙو جون  ڌيئرون هُما، دعا، وحيده، زال فائزه، پُٽ سمير، فيضان ٻرڙو ۽ نينگر مُدثر پُٽ عامر ٻرڙو ۽ سميع الله فوت ٿي ويون

اطلاع تي پوليس پهچي وئي جڏهن ته مدد لاءِ ڀرپاسي کان پڻ ماڻهن جو وڏو انگ پهچي ويو، فوتين جا لاش پوليس موري اسپتال کڻائي آئي جٿان ضروري ڪارروائي بعد وارثن حوالي ڪيا ويا

حادثي جو شڪار بدنصيب ڪُٽنب عيد ملهائڻ لاءِ ڳوٺ ويو هو، ڪراچي واپسي دوران سندن ڪار سان ڪوچ ٽڪرائجي وئي، حادثي بعد فوتين جو اباڻو شهر ميرپور ٻرڙو سوڳ ۾ بند ٿي ويو

 هڪ ئي ڪٽنب جي 8 ڀاتين جي جي جنازي نماز ادا ڪرڻ بعد اباڻي قبرستان ۾  مڙهه مٽيءَ ماءُ حوالي ڪيا ويا جڏهن ته حادثي سبب فوتين جي گهرن ۾ عيد جون خوشيون ماتم ۾ تبديل ٿي ويون