| مولانا ادريس جي هڪ قاتل جي سڃاڻپ، افغانستان سان واسطو |
ڪراچي (م ڊ) جي يو آءِ جي اڳوڻي خيبرپختونخواهه اسيمبلي ميمبر مولانا محمد ادريس کي شهيد ڪندڙ جوابدارن جون تصويرون ملي ويون مختلف شهرن ۾ احتجاجي مظاهرا ڪيا ويا. گذريل ڏينهن چارسده ۾ نامعلوم ماڻهن هٿان قتل ڪيل مولانا محمد ادريس جي ڪيس ۾ جاچ اختيارين سيف سٽي ڪيمرائن جي مدد سان ڏوهارين جون تصويرون حاصل ڪري ورتيون، ٽارگيٽ ڪلنگ ۾ ملوث 4 مان هڪ دهشتگرد جي سڃاڻپ به ڪئي وئي آهي. شروعاتي جاچ موجب مولانا ادريس جي قتل جو منصوبو افغانستان ۾ ٺاهيو ويو، دهشتگرد جو تعلق افغانستان سان آهي، انهي جي مڪمل نيٽ ورڪ جو پتو لڳايو پيو وڃي. ڌ قتل جي ذميواري پابندي مڙهيل داعش قبول ڪئي آهي، جڏهن ته القاعده برصغير ۽ تحريڪ طالبان پاڪستان (ٽي ٽي پي) حملي جي مذمت ڪئي آهي ۽ ان تي افسوس جو اظهار ڪيو آهي. حملي خلاف چارسده، ٽانڪ، پشاور ۽ ڪوئيٽا سميت مختلف علائقن ۾ احتجاج ڪيو ويو. چارسده ۾ احتجاجي مظاهري ۾ وڏي تعداد ۾ ماڻهن شرڪت ڪئي. چارسده ۾ فاروق اعظم چوڪ تي احتجاج ڪيو ويو، جنهن ۾ مولانا گوهر شاهه ۽ ٻين اڳواڻن تقرير ڪئي ۽ مولانا ادريس جي قاتلن جي گرفتاري جو مطالبو ڪيو.