ميرپورخاص ۾ ٽرانسپورٽرن پاران اضافي ڀاڙا اوڳاڙي ڪرڻ جو انڪشاف، شهري عدالت پهچي ويا

ميرپورخاص(بيورو رپورٽ) ميرپورخاص کان ڪراچي، حيدرآباد، سانگھڙ، عمرڪوٽ، مٺي سميت مختلف علائقن ڏانهن ويندڙ مسافر گاڏين جي ٽرانسپورٽرن پاران مسافرن کان غيرقانوني طور اضافي ڀاڙا وٺڻ جو انڪشاف ٿيو آهي، ذريعن موجب سنڌ ٽراسنپورٽ اٿارٽي پاران 2016 کان پوءِ ڪو اضافو نه ڪيو ويو آهي جڏهن ته ٽرانسپورٽرن پاران من پسند ڀاڙا مقرر ڪري مسافرن کي گذريل 10 سالن کان لٽيو پيو وڃي، مسافرن کان اضافي ۽ غيرقانوني ڀاڙا اوڳاڙڻ خلاف ميرپورخاص جي وڪيل ريحان عباسي پاران مسافرن کان وڌيڪ ڀاڙا غيرقانوني طور اوڳاڙڻ خلاف ميرپورخاص جي ڪنزيومر ڪورٽ ۾ درخواست داخل ڪئي آهي، وڪيل پاران ٽرانسپورٽ اٿارٽي ۽ ٽرانسپورٽرن خلاف وڌيڪ ڀاڙا اوڳاڙڻ جي درخواست دائر ٿيڻ تي عدالت سڳوري سرڪاري ڀاڙن جي لسٽ ۽ ڀاڙن ۾ اضافو ٿيڻ يا نه ٿيڻ جو مڪمل رڪارڊ سميت ريجنل ٽرانسپورت اٿارٽي جي سيڪريٽري کي 20 ڊسمبر تي عدالت ۾ طلب ڪندي سماعت ملتوي ڪري ڇڏي آهي