| مڪلي واسڻ ٽڪ ٽاڪر سان فراڊ، ويزا جعلي، ڪراچي ايئرپورٽ تان واپس |
ٺٽو (رپورٽر) مڪلي واسڻ ٽڪ ٽاڪر سان دبئي موڪلڻ جي نالي تي فراڊ ٿي ويو، لکين رپيا وصول ڪري جعلي ويزا ڏني وئي، ٽڪ ٽاڪر ڪراچي ايئرپورٽ تان واپس اچي وئي. مڪلي جي رھواسڻ ٽڪ ٽاڪر روشن خاصخيلي پريس ڪلب ٺٽو پھچي صحافين اڳيان دانھيندي الزام ھنيو ته ٺٽي واسي ايجنٽ الطاف نالي شخص دبئي جو ويزا وٺي ڏيڻ توڙي دبئي وٺي وڃڻ جي نالي تي 9 لک رپيا وصول ڪري کيس جعلي ويزا ڏئي ڇڏي، ھن چيو ته ھوءَ دبئي وڃڻ لاءِ گذريل رات ڪراچي ايئرپورٽ پھتي ته کيس اميگريشن جي عملي روڪي ورتو ۽ ويزا چيڪ ڪرڻ تي خبر پئي ته اھا جعلي آھي، ھن چيو ته سڄي رات ڪراچي ايئرپورٽ تي پريشان ٿيندي رھي جڏھن تہ اتي موجود الطاف کيس سڃاڻڻ کان انڪار ڪري ڇڏيو. ھن چيو تہ ساڻس وڏو ظلم ٿيو آھي ۽ ھن دبئي ڪمائڻ وڃڻ لاءِ پنھنجو گھر کپائي ڇڏيو آھي، ھن چيو تہ الطاف سموري رقم کڻي دبئي فرار ٿي ويو آھي ھن مطالبو ڪيو آھي تہ معاملي جو نوٽيس وٺي ساڻس انصاف ڪيو وڃي.