نئون ديرو: بلاول جي ٻنين مان هارپو کسڻ تي احتجاج، مئنيجر تي الزام

نئون ديرو(ن پ ا) نئون ديرو ڀرسان ڳوٺ صابل جوڻيجو واسي ڀٽو اسٽيٽ جي هارين پاران عورتن ۽ معصوم ٻارڙن سان گڏ اسٽيٽ مئنيجر جي ناجائزين خلاف قربان جوڻيجو، مولا بخش جوڻيجو، پيرسن عورت ايمڻان خاتون، شاهده خاتون ۽ الطاف خاتون ٻين احتجاج ڪيو، اڳواڻن چيو ته بلاول ڀٽو زرداري جا هاري آهيون ۽ 40 ورهين کان زمينون آباد ڪندا پيا اچون، جيالا به آهيون، هنن الزام هڻندي چيو ته ڀٽو اسٽيٽ جي مئنيجر ۽ سندس پٽ ناجائزي ڪندي اسان کان 6 جريب زمين جي ڪڙمت کسي اناج به ڏاڍ ڪري کڻائي ويو آهي. اسان جو گذر سفر ۽ ٻچن جو روزگار کسيل زمين جي هارپي تي آهي جيڪو به بغير جواز جي اسان کان کسي اسان کي بيروزگار ڪري ٻچن جي پيٽ تي لت ڏني وئي آهي، هنن مطالبو ڪيو ته پ پ قيادت معاملي جو نوٽيس وٺي، ٻي طرف ڀٽو اسٽيٽ جي مئنيجر سان رابطو ڪرڻ جي ڪوشش ڪئي وئي پر رابطو نه ٿي سگهيو.