نائب وزيراعظم پاران يورپي يونين کي وچ اوڀر امن ڪوششن بابت آگاهي

اسلام آباد (بيورو رپورٽ)  پرڏيهي وزارت جي ترجمان چيو آهي ته نائب وزيراعظم ۽ پرڏيهي وزير اسحاق ڊار يورپي يونين جي پرڏيهي معاملن ۽ سلامتي پاليسي بابت اعليٰ نمائندي ڪايا ڪالاس سان ٽيليفون تي رابطو ڪيو. ڳالهه ٻولهه دوران ٻنهي اڳواڻن خطي ۾ تيزي سان بدلجندڙ صورتحال جو جائزو ورتو. ڪايا ڪالاس اسلام آباد مفاهمتي يادداشت تي صحيحن تائين پهچڻ لاءِ پاڪستان جي مخلصاڻين سفارتي ڪوششن کي ساراهيو ۽ تازين جنگبندي ڀڃڪڙين تي ڳڻتي ظاهر ڪئي. اسحاق ڊار ڪايا ڪالاس کي وچ اوڀر ۾ امن ۽ استحڪام لاءِ جامع فريم ورڪ قائم ڪرڻ بابت پاڪستان جي جاري سفارتي ڪوششن کان آگاهه ڪيو ۽ سڀني ڌرين تي زور ڏنو ته جنگبندي معاهدي تي مڪمل عمل ڪن. ٻنهي ڌرين مستقبل ۾ به ويجهي رابطي ۽ مشاورت جاري رکڻ تي اتفاق ڪيو.