نادر جمالي جي قتل خلاف دادو واسي سراپا احتجاج ، 4  ڪلاڪ ڌرڻو: ايس ايس پي آفيس جا در بند

دادو (رپورٽ: ڪامران ڪورائي) دادو ۾ جڙتو پوليس مقابلي ۾ ماريل نوجوان نادر جمالي جي خون سان انصاف لاءِ سوين ماڻهو رستن تي نڪري آيا، علام آءِ آءِ قاضي کان پريس ڪلب تائين ريلي ڪڍي ڌرڻو، سول سوسائٽي اڳواڻن، وڪيلن ۽ شهرين جي وڏي انگ ۾ شرڪت ڪئي، ڌرڻو 4 ڪلاڪن تائين جاري رهيو، مظاهرين پاران پوليس خلاف نعريبازي  ڪئي وئي، اڳواڻن چيو ته نادر جمالي هڪ زميندار ۽ همدرد رکندڙ انسان هو، پوليس گرفتاري بعد ڪوڙي مقابلي ۾ کيس قتل ڪيو آهي، واقعي جي جيتري مذمت ڪجي، گهٽ آهي، واقعي جي جڊيشل انڪوائري ڪري ذميوار پوليس عملدارن ۽خلاف ڪارروائي جو مطالبو  ڪيو ويو احتجاجي مظاهري ۾ مارجي ويل نادر جمالي جو پٽ سليمان جمالي، ڀاءُ باقر جمالي، سئوٽ خادم جمالي، مبين جمالي، علي حسن جمالي سميت خاندان جا فرد شريڪ ٿيا. دادو جون سياسي سماجي ڌريون، عاشق علي زئونر، آصف جمالي ايڊووڪيٽ پير هني، غلام علي مغل، رئيس عمير خان جمالي، سماجي اڳواڻ روزينا جتوئي، مجيده جمالي، سرفراز نبي لنڊ، سردار صدام خان جمالي، عمير احمد جمالي، محمد خان جمالي زبير قادر جمالي باسط جمالي ۽ ٻين سياسي ۽ سماجي اڳواڻ پڻ وڏي انگ ۾ احتجاج ۾ شرڪت ڪئي مظاهرين هٿن ۾ بينر ۽ پلي ڪارڊ کڻي سخت نعري بازي ڪئي بينرن  ي شهيد نادر جمالي جون تصويرون ۽ “انصاف ڏيو” جا نعرا لکيل هئا. مظاهرين پوليس خلاف سخت نعرا هنيا ۽ الزام هنيو ته نادر جمالي کي ڪوڙي مقابلي ۾ قتل ڪيو ويو آهي، ان موقعي تي وارثن پاران اعلان ڪيو ويو ته جيڪڏهن سندن جائز مطالبا نه مڃيا ويا ته 18 جنوري تي انڊس هاءِ وي تي ڌرڻا هڻي شاهراهن کي بند ڪيو ويندو، ۽ اهي ڌرڻا مطالبن جي مڃتا تائين جاري رهندا.
 

دادو: پ پ ايم اين اي رفيق جمالي چيو آهي ته نادر جمالي جو قتل عدالت کان مٿانهون قتل آهي، واقعي جي جڊيشل انڪوائري لاءِ اڄ نوٽيفڪيشن جاري ٿي ويندو، ميڊيا سان ڳالهائيندي هن چيو ته وارثن پوليس جي جاچ تي بي اعتمادي ظاهر ڪئي آهي، جڊيشل انڪوائري جو مطالبو پورو ڪيو آهي، وارث جيئن چاهيندا، تئين ٿيندو، اسان گڏ آهيون، سڀ گواهه آهن ته نادر جمالي جو عدالت کان مٿانهون قتل ٿيو آهي، جيترو ڏوهه هو، اوتري سزا ملڻ گهرجي، وڌيڪ سزا عدالت ڏيندي آهي
 

دادو:  دادو ۾ جاري احتجاج دوران پوليس مقابلي ۾ مارجي ويل نادر جمالي جو ننڍڙو سليمان جمالي به بينر کڻي احتجاج ۾ شامل ٿيو، جنهن بينر تي نادر جمالي جي تصوير سان گڏ ايس ايس پي دادو امير سعود مگسي جي گڏيل تصوير لڳل هئي. احتجاج دوران سليمان جمالي ايس ايس پي دادو جي چهري تي ڪاري پين سان ليڪا ڪڍي ڇڏيا، جنهن سان احتجاج ڪندڙن ۽ موجود ماڻهن جون اکيون آليون ٿي ويون. سليمان جمالي ان موقعي تي ٽائيم نيوز سان ڳالهائيندي چيو ته، “مان بابا سان گڏ بابا جي قاتل کي نٿو ڏسي سگهان.” هن معصوم ٻار پنهنجي درد جو اظهار ڪندي ايس ايس پي دادو امير سعود مگسي جي تصوير تي ڪاري پين سان ليڪا ڪڍي پنهنجو احتجاج رڪارڊ ڪرايو. ان کان پوءِ سليمان جمالي بينر ۾ موجود پنهنجي والد نادر جمالي جي تصوير کي چميون ڏيندو رهيو ۽ “انصاف ڏيو، انصاف ڏيو” جا نعرا هنيا، جنهن سان احتجاج جو ماحول وڌيڪ ڏکوئيندڙ بڻجي ويو. معصوم ٻار جو اهو احتجاج ماڻهن جي دلين کي ڇهي ويو