| نبي سر ۾ عورت فوت، مڙس مٿان قتل جو شڪ، لاش رکي ڌرڻو، 5 ڪلاڪ روڊ بلاڪ |
نبي سرروڊ (رپورٽ: بنڀو خان چانڊيو) نبي سر ڀرسان ڳوٺ هاشم خاصخيلي جي رهواسي ناري زينت زال يوسف خاصخيلي مبينا طور فوت ٿي وئي، ناري جي وارثن پاران سندس مڙس يوسف تي ناري کي قتل ڪرڻ جو انڪشاف ڪندي لاش پوسٽ مارٽم ڪرائي حقيقت معلوم ڪرڻ لاءِ نبي سر ٿاڻي تي پهتا جتي پوليس پاران ناري بلوچستان جي علائقي حب چوڪي ۾ فوت ٿيڻ جو جواز ڄاڻائي ناري جي وارثن کي ليٽر وغيره ڏيڻ کان انڪار ڪيو جنهن تي خاصخيلي برادري جي ماڻهن پاران ناري جو لاش روڊ تي رکي ڌرڻو هڻي ڇڏيو روڊ بلاڪ ڪري ڇڏيو، ۽ پوليس خلاف نعريبازي ڪئي وئي جڏهن ته ڌرڻو 5 ڪلاڪ کان جاري رهيو جنهن ڪري ڪنري وايا نبي سر جهڏو مين روڊ جي ٽريفڪ معطل ٿي وئي، ناري زينت خاصخيلي جي وارثن مرد توڙي عورتن هارون خاصخيلي، نادر علي، رمضان توڙي ٻين احتجاج ڪندي دانهيندي چيو ته پوليس لاش جو پوسٽ مارٽم وغيره نه پئي ڪرائي ۽ مختلف بهانا ڪري رهي آهي، جنهن ڪري پريشان آهيون ۽ ٻه ڏينهن کان لاش کڻي دربدر ٿي رهيا آهيون، اسان سان انصاف ڪيو وڃي.