| نصيرآباد ۾ شهري بدامني خلاف ٿاڻي اندر ڪاهي پيا، ڌرڻو |
نصيرآباد (ن پ ا) نصيرآباد ۾ بدامني ۽ پرائمري اسڪول مان چوري واري علائقي خلاف شهري اتحاد جي سڏ تي سينگار نوناري، معشوق باداڻي، عبدالوهاب بروهي، اعجاز شيخ ۽ ٻين جي اڳواڻي ۾ مين اسڪول کان ريلي ڪڍي ٿاڻي اندر ڌرڻو هنيو ويو، اڳواڻن چيو ته هاڻي تعليمي ادارا به غير محفوظ بڻجي ويا آهن، مين اسڪول پوليس اسٽيشن ۽ ايس ايچ او جي ڪوارٽر جي وچ ۾ قائم هجڻ باوجود هي ڏهون ڀيرو آهي جو اسڪول مان چوري ٿي آهي، پوليس جوابدارن خلاف ڪابه ڪارروائي نه ڪئي آهي، هنن مطالبو ڪيو ته جوابدارن خلاف ڪارروائي ڪئي وڃي.
| گلشن حديد ويجھو گھر مان ڌاڙو: هٿياربند 35 لک جا ڳھه ڦري ويا |
ملير (رپورٽر) گلشن حديد ويجهو سومار ڳوٺ ۾ 6 کان وڌيڪ هٿياربندن گذريل رات دير سان شهري آصف کوکر جي گهر ۾ داخل ٿي گهر ڀاتين کي يرغمال بڻائي 35 لک کان وڌيڪ جا سونا زيور، موبائل فون ۽ ٻيو قيمتي سامان ڦر ڪري فرار ٿي ويا، ان سلسلي ۾ شهري آصف کوکر صحافين کي ٻڌايو ته گذريل رات ٻه وڳي جي وقت 6 کان وڌيڪ هٿياربندن گهر ۾ داخل ٿي گهرڀاتين کي يرغمال بڻائي ٻن ڪلاڪن تائين گهر ۾ موجود رهيا ۽ گهر مان 35 لکن کان وڌيڪ ماليت جا سونا زيور، روڪ رقم، موبائل فون، موٽرسائيڪل ڦر ڪري آساني سان فرار ٿي ويا جنهن بعد 15 تي واقعي جو اطلاع ڏنو واقعي بعد علاقائي پوليس ۽ ڪرائيم سين يونٽ پهچي شاهديون گڏ ڪيون ۽ متاثرن کان واقعي بابت معلومات ورتي، ٻئي طرف هٿياربندن پاران گلشن حديد ايڪسٽينشن ويجهو ڊيري فارمرز جي اڳواڻ چوڌري احمد علي حطار کان نامعلوم هٿياربندن هٿيارن جي زور تي پنج لک رپيا نقد، ٻه موبائل فون ۽ گاڏي جي چاٻي ڦر ڪري فرار ٿي ويا، ان سلسلي ۾ علائقي واسين ايس ايس پي ملير فوري طور واقعن جو نوٽيس وٺي جوابدارن کي گرفتار ڪري ۽ متاثرن کي انصاف فراهم ڪيو وڃي.
| شهدادڪوٽ ۾ شهري بدامني خلاف نڪري آيا، مظاهرو، ڌرڻو |
شهدادڪوٽ (رپورٽر) شهدادڪوٽ ۾ بدامني خلاف عمراڻي برادري جي ماڻهن طرفان عمر شاهه باءِ پاس تي احتجاجي مظاهرو ڪري ڌرڻو هنيو، احتجاج ڪندڙن ڪامريڊ محمد حيات تنيو، داد محمد کنڊ، نديم عمراڻي، جانب عمراڻي، نياز چانڊيو احمد ڪلهوڙو ۽ ٻين چيو ته 20 ڏينھن اڳ ۾ بي سيڪشن ٿاڻي جي حد مان موٽرسائيڪل سوار نامعلوم هٿيار بندن پاران نديم عمراڻي کي يرغمال بڻائي موٽرسائيڪل موبائل فون ۽ 30 هزار رپيا ڦر ڪري فرار ٿي ويا هئا. پوليس جوابدارن خلاف ڪابه ڪارروائي نه ڪئي آهي، هنن مطالبو ڪيو ته جوابدارن خلاف ڪارروائي ڪري ڦر ٿيل سامان واپس ڪرايو وڃي.
| سڪرنڊ ۾ بدامني خلاف شهري روڊن تي نڪري آيا، ڌرڻو |
سڪرنڊ (ن پ ا) سڪرنڊ شهر اندر وڌندڙ بدامني، کيسا ڪٽيندڙ گروھ کي شهرين پاران پڪڙڻ ۽ پوليس پاران انهن کي ڇڏڻ خلاف سوين شهرين شهري اتحاد جي صدر ڊاڪٽر سانول ڪيريو، سرپرست اعلي نياز لاشاري، همٿ علي خاصخيلي، جاويد علي سومرو، حسين بخش مگسي، آصف لاکو، ڌڻي بخش مگسي، وقار ڀٽي ۽ دريا خان جمالي جي اڳواڻي ۾ ريلي ڪڍي جنهن ۾ سوين شهري ۽ مختلف تنظيمن جا اڳواڻ به وڏي انگ ۾ شريڪ هئا.مظاهرين چيو ته سڪرنڊ شھر ۽ آسپاس وارن علائقن ۾ بدامني، لا قانونيت، منشيات فروشي، سان گڏ لوڪل لوفر ڇوڪرن هٿان ڳنڍي ڇوڙي ۽ کيسا ڪترڻ جو ظلم وڌي ويو آهي، جيب ڪترا، چور ۽ ڦر ڪندڙ ماڻهن کان سري عام موبائيل فون ۽ ٻيو قيمتي سامان زبردستي ڦري فرار ٿي وڃن ٿا، جيڪو روز جو معمول بڻجي ويو آهي پر سڪرنڊ پوليس اگهوري ننڊ ستل آهي، شهر اندر ماڻهن جو جيئڻ جنجال بڻجي ويو آهي جيب ڪترن، چورن ۽ منشيات فروشن کي کلي ڇوٽ ڏني وئي آهي. هنن وس وارن کان مطالبو ڪيو ته سڪرنڊ شھر ۽ آسپاس وارن علائقن مان وڌندڙ بدامني، لا قانونيت، اسٽريٽ ڪرائيم ۽ منشيات ختم ڪرائي شھرين ۾ پکڙيل بيچيني ختم ڪئي وڃي ٻي صورت ۾ سخت احتجاج ڪيو ويندو.
ڏوڪري ۾ بدامني، ٻن ميڊيڪل اسٽورن کي کاٽ هڻي چوري
موهن جو دڙو (ن پ ا) ڏوڪري ۾ ٻن ميڊيڪل اسٽورن مان لکين رپين جي چوري ڪئي وئي،صحافي معشوق ڏيرو ۽ سلطان ميڊيڪل اسٽور مان نامعلوم چور ڇت کي کاٽ ھڻي لکين رپيا چوري ڪري ويا،معشوق ڏيرو جي اسٽور مان 2 لک 80 هزار ۽ سلطان ميڊيڪل اسٽور مان 45 هزار رپيا روڪ رقم چوري ٿي ويا، متاثرن مطالبو ڪيو ته جوابدارن خلاف ڪارروائي ڪري علائقي ۾ امن امان قائم ڪرايو وڃي.
”امن ڪرايو” سکر ۾ جي يو آءِ جي ريلي، مظاهرو
سکر (بيورو رپورٽ) جي يو آءِ سکر پاران امن بحال ڪريو تحريڪ جي سلسلي ۾ سکر ٿرمل پاور هائوس وٽ سکر-روهڙي ويندڙ روڊ تي احتجاجي مظاهرو ڪري پوليس خلاف نعريبازي ڪئي وئي. اِن موقعي تي جمعيت علماءِ اسلام ضلعي جي امير ۽ صوبائي ڊپٽي سيڪريٽري جنرل مولانا محمد صالح انڍڙ، حافظ عبد الحميد مهر، قاري لياقت علي مغل، مولانا امان الله، مفتي محمد اعظم مهر ۽ ٻين چيو آهي ته ضلعي ۾ وڌندڙ بدامني، لا قانونيت پوليس جي ناڪامي جو واضح ثبوت آهي، جنهن خلاف “امن بحال ڪريو” تحريڪ شروع ڪئي وئي آهي. هنن مطالبو ڪيو ته امن ڪرايو وڃي.
ڀٽ شاهه ۾ خانگي اسڪول مان لکن جي چوري، ڪجهه شڪي سوگها
ڀٽ شاھه (ن پ ا) ڀٽ شاهه ۾ شاھ حبيب چوڪ ڀرسان نامعلوم چور نجي اسڪول مان لکين روپين جو سامان ٻھاري کڻي ويا ، نامعلوم چورن اسڪول مان ٻارن جي اورينٽيشن ۽ تعليمي سرگرمين لاءِ استعمال ٿيندڙ ٻه ايل اي ڊي اسڪرينون، موٽر پمپ ۽ ٻيو استعمال ٿيندڙ قيمتي سامان چوري ڪري ويا، اسڪول انتظاميا طرفان اهڙي رپورٽ ڀٽ شاھ ٿاڻي تي به داخل ڪرائي وئي آهي جڏهن ته مستري حبيب شيخ جي دوڪان جا به نامعلوم چور تالا ٽوڙي 4 موٽر چوري ڪري فرار ٿي ويا، اطلاع موجب ڀٽ شاھ پوليس چوري جي وارداتن ۾ ملوث ڪجهه شڪي ماڻهن کي جاچ لاءِ حراست ۾ وٺي ڇڏيو .
ڪڪڙ ويجهو نوجوان کان موبائل فون، روڪ رقم ۽ سامان ڦر
ڦلجي اسٽيشن (ن پ ا) ڦلجي اسٽيشن ڀرسان سينئر صحافي غلام سرور پنهور جي پٽ سرفراز سرور پنهور کان ڪڪڙ ٿاڻي جي حد انڊس هاءِ وي ابڙا پيٽرول پمپ وٽ ڏينهن ڏٺي جو ٽن اڻڄاتل موٽرسائيڪل سوار هٿياربندن هٿيارن جي زور تي روڪي سي ڊي موٽرسائيڪل موبائيل فون روڪ رقم ۽ سامان ڦر ڪري ويا آهن اطلاع ملڻ باوجود پوليس نه پهتي ڦر متاثر ايس ايس پي دادو کان مطالبو ڪندي چيو ته ڪڪڙ پوليس کان سختي سان پڇاڻو ڪري ڦر ڪيل موٽرسائيڪل ۽ سامان واپس ڪرائي ڏنو وڃي،ٻي صورت ۾ سخت احتجاج ڪيو ويندو.
گهوٽڪي ۾ جوابدار گهر ۽ نياڻي جو ڏاج ساڙي رقم چورائي ويا
گهوٽڪي (رپورٽر) گهوٽڪي شهر جي ٽنڊو ٽٻائي پاڙي ۾ پورهيت عرفان عاربي/ڏسو صفحو 2 بقايا 27
جي نياڻي جي رخصتي کان اڳ هڪ ڏينهن اڳ نامعلوم شر پسند ماڻهن گهر ۾ داخل ٿي نياڻي جي ڏاج کي باهه ڏئي ساڙي ڇڏيو، اي سيڪشن ٿاڻي تي رپورٽ داخل ڪرائي وئي آهي، ان حوالي سان پورهيت عرفان عاربي ٻڌايو ته نياڻي جي مهندي جي رسم لاءِ ويل هياسين، واپس موٽياسين ته گهر کي باهه لڳل هئي، خبر ناهي ڪنهن ظالم نياڻي جو ڏاج پيٽي مان ڪڍي ساڙي گهر ۾ رکيل روڪ رقم کڻي گهر کي باهه ڏئي ويا. هن وس وارن کان مطالبو ڪيو ته جوابدارن خلاف ڪارروائي ڪري مالي سهائتا ڪئي وڃي.