ننگر پارڪر ۾ فيڪٽرين جي زهريلي پاڻي سبب کوهه خراب ٿي ويا، عدالت ۾ درخواست، 22 نومبر جا نوٽيس

ننگرپارڪر(ن پ ا) ننگرپارڪر شهر ۾ چائناڪلي فيڪٽرين مان زهريلي پاڻي سبب پيئڻ جي پاڻي جا کوهه خراب ٿي ويا آهن، فيڪٽري مالڪن خلاف ننگرپارڪر جي عدالت ۾ داخل درخواست تي ٻڌڻي ٿي. سنڌ انوائرمينٽل پروٽيڪشن ايجنسي طرفان کوهه خراب ٿيڻ خلاف عدالت ۾ ڏنل درخواست تي ننگرپارڪر جي سول جج ۽ جڊيشل مئجسٽريٽ سڪندر علي جي چانڊيو جي عدالت ۾ ٻڌڻي ٿي، ٻڌڻي ۾ سڀئي ڌريون ۽ فريادي عدالت ۾ حاضر ٿيا. ان موقعي تي عدالت ۾ الزام نامو پڙهي ٻڌايو ويو. جنهن بعد ايندڙ ٻڌڻي تاريخ 22 نومبر 2025ع تي مقرر ڪئي وئي آهي، واضع رهي ته چائناڪلي جي گدلاڻ شهرين کي پاڻي فراهم ڪندڙ کوهن جي پاسي ۾ ندي ۾ ڇوڙ ڪئي وڃي ٿي، جيڪا سيمي ذريعي کوهن ۾ ملي وڃي ٿي، جنهن جي ڪري علائقي واسين کي بيماري ۾ وڪوڙي ڇڏيو آهي، ڪيترائي ماڻهو پٿري، معدي، گوڏن جي سور ۽ گردن جي مرض ۾ مبتلا ٿي ويا آهن.