| نوشهروفيروز اسپتال ۾سيڪريٽري صحت جي آمد وقت بيڊ خالي: الٽراسائونڊ ۽ ايڪسري بند |
نوشهروفيروز/مورو(نمائندن وٽان) صحت واري سيڪريٽري ريحان اقبال بلوچ جا نوشهري فيروز سول اسپتال ۽ موري تعلقي اسپتال جا دورا، سيڪريٽري جي دوري وقت سول اسپتال جي مختلف وارڊن ۾ ڪو به مريض داخل ٿيل نه هو، سمورا بيڊ خالي پيل هئا، ايڪسري مشين، الٽرا سائونڊ مشين ۽ ليبارٽري بند پيل هئا، دل واري وارڊ مان ايئرڪنڊيشنر غائب هو، اسپتال جي اهڙي صورتحال تي صوبائي سيڪريٽري ايم ايس تي ناراضپو ظاهر ڪندي ڇنڊ پٽي، بعد ۾ ميڊيا سان ڳالهائيندي صوبائي سيڪريٽري ريحان اقبال بلوچ صحافين سان ڳالهائيندي چيو ته نوشهروفيروز اسپتال کي سول اسپتال جو درجو مليل آھي، اسان ڪوشش ڪري رهيا آھيون ته آءِ سي يو وارڊ الڳ قائم ڪجي، هن چيوته سڄي سنڌ ۾ ڊاڪٽرن جي کوٽ آھي، اسان 600 کان وڌيڪ گوسڙو ڊاڪٽرن کي شو ڪاز نوٽيس ڏنا آھن. مقامي ڊاڪٽر اسپتالن ۾ ڊيوٽي ڪرڻ لاء تيار ناهن، اهي اعليٰ ڊگريون وٺڻ لاءِ ٻاهر ويل آھن، اميد آھي ته اهي واپس اچي علائقي جي خدمت ڪندا، هن چيو ته سول اسپتال ۾ عملي جي کوٽ پوري ڪري جلد وينٽيليٽر لڳايا ويندا، هن وڌيڪ چيو ته سموري سنڌ ۾ عطائي ڊاڪٽرن خلاف قانوني ڪارروائي ڪري رهيا آھيون، کين جيل اماڻيو ويندو، عطائي ڊاڪٽرن جي غلط علاج سبب ڪيترائي ماڻهو پنهنجون زندگيون وڃائي ويٺا آهن، هوڏانهن صحت واري سيڪريٽري ريحان اقبال بلوچ موري اسپتال پھچي مختلف وارڊن، ميڊيڪل اسٽور، او پي ڊي ۽ ٽراما سينٽر جو معائنو ڪيو، هن سھولتن جي اڻهوند تي ذميوارن کان پڇاڻو ڪيو. ان موقعي تي سيڪريٽري ريحان اقبال بلوچ چيو ته موري اسپتال ۾ ڊاڪٽرن ۽ عملي جي کوٽ جو پورائو ڪبو، جلد بيهوشي وارو ڊاڪٽر مقرر ڪري بند پيل آپريشن ٿيٽر کي فعال ڪبو هن چيو ته موري اسپتال ۾ دوائن جي کوٽ ناھي، اسٽور ۾ وڏي مقدار ۾ دوائون موجود آھن.