| نيپا ٻالڪ واقعو: ڪراچي اوڀر جي ڊي سي ۽ ايس پي سوڌو 7 ڪامورا معطل: جاچ جو حڪم |
ڪراچي (رپورٽ: الطاف چنا ۽ حبيب جمالي )سنڌ جي وزيراعليٰ مراد شاهه نيپا ويجهو گٽر ۾ ڪِري فوت ٿيل معصوم ٻارڙي ابراهيم واري واقعي جو سخت نوٽيس وٺي ڪراچي اوڀر جي ڊي سي ابرار جعفر ، ايس ايس پي ڊاڪٽر فرخ ملڪ، ڪي ايم سي جي سينيئر ڊائريڪٽر( ميونسپل سروسز ) عمران راجپوت، ٽي ايم سي گلشن اقبال جي اسسٽنٽ انجنيئر راشد فياض، ڪراچي واٽر بورڊ جي ايڪسين وقار احمد، گلشن اقبال جي اي سي عامر شاهه، مختيار ڪار سلمان فارسي کي معطل ڪري ڇڏيو، جڏهن ته معاملي جي جاچ لاءِ ايڊيشنل آءِ جي ڪراچي جي سربراهيءَ ۾ 3 رڪني ڪاميٽي پڻ جوڙي ڇڏي ڪاميٽيءَ ۾ ڊي آءِ جي ايڊمن احمد نواز چيما، ۽ ايس پي انويسٽيگيشن انعم تجمل شامل آهن. هوڏانهن ڪاميٽيءَ جا ميمبر فوت ٿيل ٻارڙي ابراهيم جي گهر به پهتا ۽ وارثن سان ملاقات به ڪئي. ايس پي انعم تجمل ٻارڙي جي وارثن کي واقعي جو ڪيس داخل ڪرائڻ جي حوالي سان به ڳالهه ٻولهه ڪئي. جاچ ڪاميٽيءَ3 ڏينهن اندر رپورٽ جمع ڪرائيندي. هوڏانهن ميئر مرتضيٰ وهاب فوتي ٻالڪ جي گهر پهچي والد ۽ ڏاڏي سان تعزيت ڪئي، بعد ۾ رات دير سان پريس ڪانفرنس ڪندي ميئر ٻالڪ جي فوتگي تي ڪراچي انتظاميا پاران معافي ورتي، هن چيو ته اسان کي واقعي وقت گهڻو ڪجهه ڪرڻ گهرجي ها پر اسان ائين ڪري نه سگهيا سين، هن چيو ته اسان جي ڪوشش هوندي ته مستقبل ۾ اهڙو ڪو واقعو پيش نه اچي، هن چيو ته ڪراچي ۾ 2 لک 45 هزار مين هول آهن، اڳ ۾ لوهي ڇڪڻ هوندا هئا، جيڪي موالي چوري ڪندا هئا، اسان بعد ۾ پلاسٽڪ جا ڍڪڻ لڳايا آهن.، هن چيو ته في الحال 7 ڪامورا معطل ٿيا آهن ، جاچ بعد وڌيڪ ڪارروائي ڪئي ويندي.
ڪي ايم سي پاران بي آر ٽي ريڊ لائين ۽ خانگي اسٽور انتظاميا ذميوار قرار
ڪراچي؛ ڪي ايم سي نيپا واقعي جي جاچ ڪري بي آر ٽي ريڊ لائين اٿارٽيز ۽ خانگي اسٽور انتظاميا کي ذميوار قرار ڏنو، ڪي ايم سي جي ڊائريڪٽر عمران راجپوت رپورٽ ۾ ڄاڻايو آهي ته واقعي جو سبب بي آر ٽي جي اڏاوت هئي، ڪجهه هنڌن تي نالا عارضي لوهي ڍڪڻن سان ڍڪيل هئا، ڊپارٽمينٽل اسٽور اڳيان هڪ نالي کي ڍڪ نه ڏنو ويو هو، واقعو بي آر ٽي عملدارن ۽ ڊپارٽمينٽل اسٽور جي انتظاميه جي لاپرواهيءَ سبب پيش آيو،.
نيپا جو کليل گٽر ريڊ لائين کان گهڻو پري آهي: بي آر ٽي انتظاميا
ڪراچي: ڪي ايم سي اختيارين پاران بي آر ٽي ريڊ لائين پراجيڪٽ جي انتطاميا تي الزام لڳائڻ بعد بي آر ٽي اختيارين وري ڪي ايم سي کي وضاحتي خط لکي ڇڏيو آهي، خط ۾ چيو ويو آهي ته ريڊ لائين انتظاميا تي ڪي ايم سي پاران لڳايل الزام رد ڪريون ٿا، واقعي سان بي آر ٽي انتظاميا کي جوڙڻ اصل ۾ واقعي تان ڌيان هٽائڻ آهي، خط موجب واقعي واري جاءِ بي آر ٽي منصوبي جي هلندڙ ڪم کان گهڻو پري آهي، بي آر ٽي جو مين هول، سيوريج يا نالي تي انتظامي ڪنٽرول ناهي، واقعي تي افسوس آهي، اسان هر تحقيق ۽ سهڪار لاءِ تيار آهيون.