هلٽن هوٽل آمريڪي صدرن لاءِ خطرناڪ، ريگن تي به حملو ٿيو

واشنگٽن: واشنگٽن هلٽن هوٽل ڪنيڪٽيڪٽ ايونيو ۾ واقع آهي. هي اهو ساڳيو هوٽل آهي جتي 1981 ۾ اڳوڻي صدر رونالڊ ريگن کي گولي هڻي زخمي ڪيو ويو هو. اهو واقعو 30 مارچ 1981 تي پيش آيو، جڏهن بندوق بردار جان هينڪلي جونيئر ان وقت جي صدر ريگن تي فائرنگ ڪئي جڏهن هو هوٽل اندر تقرير ڪرڻ کان پوءِ پنهنجي ليموزين ڏانهن واپس وڃي رهيو هو. ريگن حملي ۾ بچي ويو پر سخت زخمي ٿي پيو جڏهن هڪ گولي صدر جي ليموزين جي پاسي کان نڪري سندس سيني ۾ لڳي. ان جي هڪ رڳ ٽٽي وئي ۽ سندس هڪ ڦڦڙ ۾ سوراخ ٿي ويو. هن کي فوري طور تي ويجهي جارج واشنگٽن يونيورسٽي اسپتال منتقل ڪيو ويو هو، جتان کيس سوا مهيني بعد 11 اپريل تي فارغ ڪيو ويو. ان وقت جو وائيٽ هائوس پريس سيڪريٽري جيمس بريڊي، هڪ سيڪريٽ سروس ايجنٽ ۽ هڪ مقامي ميٽروپوليٽن پوليس آفيسر زخمي ٿيا هئا. بريڊي دماغي زخم سبب سڄي عمر لاءِ معذور ٿي ويو هو ۽ 2014 ۾ فوت ٿي ويو هو. جان هينڪلي جونيئر کي بعد ۾ ايندڙ سال ذهني بيماري جي ڪري ڏوهي قرار نه ڏنو ويو، پر کيس واشنگٽن ۾ سينٽ ايلزبيٿ اسپتال جي وڌ کان وڌ سيڪيورٽي ونگ ۾ رکيو ويو، جتان کيس 2016 ۾ آزاد ڪيو ويو. شوٽنگ جي جاءِ تي هوٽل جي ڀت تي هڪ تختي اڃا تائين واقعي جي ياد ڏياري ٿي.