همراهه جي 25 سالن بعد واپسي: زال سندس ئي ڀاڄائي بڻجي چڪي

لکنئو (انٽريسٽنگ نيوز) هندستاني پنجاب جي هڪ ڳوٺ ۾ هڪ غير معمولي واقعو پيش آيو جڏهن هڪ مڙس جيڪو 25 سال اڳ گم ٿي ويو هو اوچتو گهر موٽي آيو، پر سندس واپسي خوشي جي بدران بحران ۾ تبديل ٿي وئي. هنسا سنگهه نالي هڪ شخص تقريبن 25 سال اڳ پراسرار طور تي غائب ٿي ويو هو. جڏهن خاندان کي ڊگهي ڳولا جي باوجود ڪو به پتو نه مليو ته ان کي مئل سمجهيو ويو. سندس زال وِملا جي شادي خاندان جي رضامندي سان هنسا سنگهه جي ننڍي ڀاءُ سُک سنگهه سان ڪرائي وئي، جنهن کي بعد ۾ ٻار ٿيا ۽ زندگي معمول مطابق هلي. تازو اتر پرديش جي نارٿور علائقي ۾ هڪ ذهني طور پريشان شخص مليو. جڏهن پوليس شڪ جي بنياد تي هن کان پڇا ڳاڇا ڪئي ته هن پنهنجو نالو هنسا سنگهه ظاهر ڪيو. يوپي پوليس پنجاب پوليس سان رابطو ڪيو، جنهن کان پوءِ هنسا سنگهه جو ڀاءُ ۽ ڳوٺ جو سردار سڃاڻپ لاءِ پهتا. گهڻي وقت ۽ بدلجندڙ شڪل جي ڪري، ڀاءُ به شروعات ۾ هن کي سڃاڻي نه سگهيو، جڏهن ته ننڍپڻ جي يادن ۽ خانداني واقعا ٻڌائڻ دوران هنسا سنگهه پنهنجي جذبات تي ضابطو نه رکي سگهيو ۽ ڳوڙها ڳاڙي ويٺو ۽ کيس سڃاتو ويو. گهر واپسي تي سڀ کان وڏو سوال وِملا جو مستقبل هو. هڪ پاسي سندس پهريون مڙس هو جيڪو 25 سالن کان پوءِ واپس آيو هو، ٻئي پاسي سُک سنگهه هو جيڪو گذريل 22 سالن کان سندس حمايت ڪري رهيو هو. آخرڪار وِملا پنهنجي موجوده خاندان ۽ ٻارن کي ترجيح ڏيندي هنسا سنگهه کي قبول ڪرڻ کان انڪار ڪري ڇڏيو.