دنيا هميشه تبديليءَ جي عمل مان گذرندي رهي آهي، پر موجوده صديءَ ۾ ترقيءَ جي رفتار زندگيءَ جي هر شعبي کي حيران ڪندڙ انداز ۾ تبديل ڪري ڇڏيو آهي. ٽيڪنالاجي، هٿرادو ذهانت، انٽرنيٽ ۽ ڊجيٽل ذريعن نه رڳو روزمرهه زندگيءَ کي آسان بڻايو آهي، پر تعليم، ڪاروبار ۽ روزگار جي تصورن کي به مڪمل طور تبديل ڪري ڇڏيو آهي. ماضيءَ ۾ تعليم جو مقصد رڳو ڊگري حاصل ڪري نوڪري ڳولڻ سمجهيو ويندو هو، پر اڄ جي جديد دؤر ۾ صرف تعليمي سندون ڪنهن فرد جي ڪاميابيءَ جي ضمانت نه رهيون آهن. موجوده دؤر ۾ ڪاميابيءَ لاءِ هنري مهارتن، جديد علمن ۽ شخصي صلاحيتن جو گڏيل هجڻ لازمي بڻجي ويو آهي. ڪنهن به قوم جي اصل طاقت ان جا نوجوان هوندا آهن. نوجوان ذهني توانائي، تخليقي صلاحيت ۽ نون خيالن کي جنم ڏيڻ جي غيرمعمولي سگهه رکن ٿا. جيڪڏهن نوجوان نسل کي جديد ضرورتن موجب تعليم سان گڏ هنر ۽ شخصي مهارتن سان پڻ سينگاريو وڃي ته اهي نه رڳو پنهنجي زندگي بهتر بڻائي سگهن ٿا، پر ملڪ جي معاشي ۽ سماجي ترقيءَ ۾ به اهم ڪردار ادا ڪري سگهن ٿا.
اڄ سڄي دنيا ۾ روزگار جا روايتي طريقا تيزيءَ سان تبديل ٿي رهيا آهن. ڪيترائي اهڙا شعبا، جيڪي ڪجهه سال اڳ غيرمعمولي سمجهيا ويندا هئا، هاڻي روزگار جا اهم ذريعا بڻجي چڪا آهن. ساڳئي وقت ڪجهه روايتي نوڪريون ٽيڪنالاجيءَ جي وڌندڙ استعمال سبب محدود به ٿي رهيون آهن. تنهن ڪري نوجوانن لاءِ ضروري ٿي ويو آهي ته هو وقت جي ضرورتن کي سمجهن ۽ پنهنجي صلاحيتن ۾ واڌارو آڻين. فني مهارتن مان مراد اهي عملي صلاحيتون آهن، جيڪي ڪنهن خاص شعبي ۾ مهارت پيدا ڪن ٿيون. اڄ جي دؤر ۾ ڪمپيوٽر پروگرامنگ، ويب ڊولپمينٽ، گرافڪس ڊيزائننگ، ڊجيٽل مارڪيٽنگ، وڊيو ايڊيٽنگ، مصنوعي ذهانت، موبائل ايپليڪيشن ڊولپمينٽ، سائبر سيڪيورٽي ۽ ڊيٽا تجزئي جهڙين مهارتن جي عالمي سطح تي تمام گهڻي گهرج آهي. اهي صرف روزگار جا ذريعا نه آهن، پر ترقيءَ جا اهڙا دروازا آهن، جيڪي نوجوانن کي عالمي مارڪيٽ سان ڳنڍي سگهن ٿا. انٽرنيٽ دنيا کي هڪ عالمي ڳوٺ ۾ تبديل ڪري ڇڏيو آهي. اڄ هڪ نوجوان پنهنجي گهر ويٺي دنيا جي مختلف ملڪن جي ادارن ۽ ڪمپنين لاءِ ڪم ڪري سگهي ٿو. فري لانسنگ ذريعي هزارين نوجوان پنهنجي قابليت جي بنياد تي مناسب آمدني حاصل ڪري رهيا آهن. ڪيترائي نوجوان يوٽيوب، بلاگنگ، مواد تخليق ڪرڻ ۽ سوشل ميڊيا پليٽ فارمن ذريعي نه رڳو مالي طور مضبوط ٿيا آهن، پر پنهنجي سڃاڻپ پڻ قائم ڪئي آهي. اهو سڀ تڏهن ممڪن ٿيو، جڏهن انهن جديد ٽيڪنالاجي کي سمجهيو ۽ نيون مهارتون سکڻ کي پنهنجي ترجيح بڻايو. ڪاميابي صرف فني صلاحيتن تائين محدود نه هوندي آهي، پر شخصي مهارتون به اوتريون ئي اهم هونديون آهن. دنيا جا وڏا ادارا صرف اهو نٿا ڏسن ته ڪنهن فرد وٽ ڪيترو علم آهي، پر اهو به جاچين ٿا ته هو ٻين سان ڪيئن ڳالهائي ٿو، مسئلن جو حل ڪيئن ڳولي ٿو، دٻاءَ جي حالتن ۾ ڪيئن فيصلا ڪري ٿو ۽ ٽيم سان گڏجي ڪم ڪرڻ جي ڪيتري صلاحيت رکي ٿو. اهي صلاحيتون سافٽ اسڪلز سڏجن ٿيون. انهن ۾ اثرائتي گفتگو، قيادت، وقت جي پابندي، فيصلا ڪرڻ جي صلاحيت، مثبت رويو، تخليقي سوچ ۽ مسئلن کي حل ڪرڻ جون صلاحيتون شامل آهن. جيڪڏهن هڪ نوجوان فني مهارتن سان گڏ انهن شخصي صلاحيتن جو به مالڪ هجي ته سندس ڪاميابيءَ جا امڪان ڪيترائي ڀيرا وڌي وڃن ٿا. مثال طور، هڪ فرد تمام سٺو گرافڪس ڊيزائنر ٿي سگهي ٿو، پر جيڪڏهن هو پنهنجي خيالن کي ٻين تائين مؤثر انداز ۾ پهچائي نٿو سگهي يا وقت جي پابندي نٿو ڪري ته سندس پيشيوراڻي ترقي محدود ٿي سگهي ٿي. ساڳيءَ ريت، هڪ سٺو پروگرامر جيڪڏهن ٽيم سان گڏ بهتر نموني ڪم ڪرڻ ڄاڻي ٿو ته هو وڌيڪ تيزيءَ سان ترقيءَ جون منزلون طئي ڪري سگهي ٿو.
موجوده دؤر ۾ مصنوعي ذهانت نوجوانن لاءِ نوان موقعا پيدا ڪيا آهن. هٿرادو ذهانت هاڻي صرف وڏن ادارن تائين محدود نه رهي آهي، پر عام ماڻهو به مختلف پليٽ فارمن ذريعي ان مان فائدو وٺي رهيا آهن. مواد تيار ڪرڻ، گرافڪس، ڊجيٽل مارڪيٽنگ، تحقيق، ڪاروباري منصوبابندي ۽ ٻين ڪيترن ئي شعبن ۾ هٿرادو ذهانت نوجوانن لاءِ آسانيون پيدا ڪري رهي آهي. جيڪي نوجوان هن جديد ٽيڪنالاجي کي سمجهڻ ۽ استعمال ڪرڻ جي صلاحيت رکن ٿا، اهي مستقبل جي ڊوڙ ۾ ٻين کان گهڻو اڳتي هوندا. بدقسمتي سان اسان جي سماج ۾ اڃا به ڪيترائي ماڻهو صرف روايتي ڊگرين کي ئي ڪاميابيءَ جو رستو سمجهن ٿا، جڏهن ته دنيا جو تجربو اهو ثابت ڪري چڪو آهي ته ڪاميابيءَ جو تعلق صرف ڊگري سان نه، پر مهارت، محنت ۽ مسلسل سکڻ جي جذبي سان به هوندو آهي. موجوده دؤر ۾ هنري ۽ شخصي مهارتون ڪاميابيءَ جي ڏاڪڻ جي حيثيت رکن ٿيون. جيڪي نوجوان اڄ پنهنجي وقت ۽ توانائيءَ کي مثبت سرگرمين ۽ مهارتن حاصل ڪرڻ ۾ استعمال ڪندا، اهي سڀاڻي نه رڳو باوقار روزگار حاصل ڪندا، پر سماج ۽ ملڪ جي ترقيءَ جا معمار پڻ ثابت ٿيندا. مستقبل انهن ماڻهن جو آهي، جيڪي سکڻ جو جذبو رکن ٿا، ڇو ته علم انسان کي رستو ڏيکاري ٿو ۽ مهارت ان کي منزل تائين پهچائي ٿي.