والاريل ڪشمير جا ماڻهو ڀارتي اسپانسرڊ دهشتگردي جو شڪار

اسلام آباد: پرڏيهي ترجمان طاهر اندرابي چيو آهي ته سنڌ طاس معاهدي جي ڀڃڪڙي ڪنهن به صورت ۾ قبول نه ڪئي ويندي، جڏهن ته والاريل ڪشمير جا ماڻهو ڀارتي اسپانسرڊ دهشتگردي جو شڪار آهن، ڀارتي ميڊيا ۾ انٽليجنس آفيسرن جي ملاقاتن ۽ رقم جي افواهن جون ڳالهيون رڳو پرين جون ڪهاڻيون آهن. هن چيو ته اسان جي بهادر هوائي فوج دشمنن جا جيڪي به جهاز ڪيرايا، اهي هاڻي تاريخ جو حصو بڻجي چڪا آهن، اسان پنهنجي ائير فورس جي دعويٰ تي قائم آهيون، هوائي فوج پاڻ کان ڪيئي ڀيرا وڌيڪ سگهاري دشمن کي شڪست ڏني، ڀارت آمريڪي صدر کي جنگ بندي لاءِ درخواست ڪئي، آمريڪي صدر جو موقف نهايت اهم آهي. ترجمان چيو ته ڀارت جا جيڪي جهاز تباهه ٿيا، انهن ۾ رافيل ۽ ٻين ماڊلز بابت ٿورو مونجهارو آهي، پر ڪيرايل جهازن جو انگ ساڳيو آهي جيڪو پهريان ڄاڻايو ويو، اسان پنهنجن شهرين جي جانين جي تحفظ لاءِ هر ممڪن قدم کڻنداسين.