چينيوٽ(پنهنجي ڊيسڪ) پيپلز پارٽي جي چيئرمين بلاول ڀٽو چيو آهي ته ياد رکو! نواز شريف اقتدار ۾ آيو ته انتقام وٺندو، آئون کين سڃاڻان ٿو، سندن دل ۾ نفرت ۽ بغض آهي
چنيوٽ ۾ چونڊ جلسي کي خطاب ڪندي بلاول ڀٽو زرداري چيو آهي ته انتقام وٺڻ نواز شريف جي عادت آهي، هو انتقام وٺي ملڪ کي نقصان پهچائيندو، عوام پنهنجي ووٽ جي طاقت سندن سازش ناڪام بڻائي سگهي ٿو
بلاول چيو ته نوازشريف جو پهريون ۽ ٻيو دور آمريت کان گهٽ نه هو، سندس پهرين ۽ ٻئي دور جو ظلم اسان برداشت ڪيو آهي
هن چيو ته پي ٽي آءِ جا ڪارڪن سمجهن ٿا ڏکيا ڏينهن ختم ٿي ويا، کين اندازو ئي ناهي ته نواز شريف چوٿون ڀيرو وزيراعظم ٿيو ته ڇا ٿيندو، جيڪو ٽي ڀيرا وزيراعظم ٿي چڪو، اُهو چوي ٿو چوٿون ڀيرو وزيراعظم بڻايو، ڪير کائنس پُڇي ته ٽي دفعا وزيراعظم رهي ڇا ڪندو رهيو
پ پ چيئرمين چيو ته ڀيرا وزيراعظم رهندڙ شخص چوٿون ڀيرو وزيراعظم بڻيو ته پي ٽي آءِ، جج ۽ سياستدان محفوظ نه رهندا
بلاول چيو ته بينظير جي قتل جو پلاند وٺڻ بدران اسان غريب عوام جي خدمت ڪنداسين، اسان ڪنهن جي به خلاف انتقامي ڪارروائي نه ڪنداسين، آصف علي زرداري به بينظير جي شهادت تي پاڪستان کپي جو نعرو هنيو هو
سندس چوڻ هو ته مون کي موقعو ڏيو، آئون ڪنهن کان به انتقام نه وٺندس، سموريون پارٽيون اسان جي واعدن جي نقل ڪري رهيون آهن، پر نقل لاءِ به عقل جي ضرورت آهي، جيڪو هُنن وٽ ناهي
ٻئي پاسي لاهور ۾ ورڪرز ڪنوينشن کي خطاب ڪندي آصفه ڀٽو زرداري چيو ته رڳو پيپلز پارٽي کي غريبن جي اهنجن جو احساس آهي، بلاول ڀٽو اقتدار مليو ته سڀني کي ڇِت ملندي، پيپلز پارٽي عوام سان گڏ هئي، آهي ۽ رهندي
